Էրտողանը կը շարունակէ թուրք-մեսխեթցիները Արեւմտեան Հայաստանի մէջ վերաբնակեցնել

Թրքական Anadolu լրատուական գործակալութեան փոխանցմամբ՝ Թուրքիոյ նախագահ Ռեճէպ Էրտողանի հրամանով Ուքրանիայէն (Դոնբաս) բերուած եւ Էրզինճանի (Երզնկա) նահանգի Ուզումլու շրջանին մէջ վերաբնակեցուած է 1206 թուրք–մեսխեթցի (Ախալցխայի թուրքեր): Այժմ որոշուած է եւս 268 թուրք–մեսխեթցի տեղաւորել Պիթլիսի (Բաղէշ) նահանգի Ահլաթ (Խլաթ) շրջանին մէջ: Այս մասին յայտարարած է Թուրք–մեսխեթցիներու Համաշխարհային միութեան գլխաւոր քարտուղար Ֆուատ Ուչարը:

Ան յիշեցուցած է, որ թուրք-մեսխեթցիներու գաղթը դէպի Ուզումլու մեկնարկել է նախորդ տարուան դեկտեմբեր 25-ին, եւ գաղթի երեք փուլերէն ետք Ուզումլուի մէջ հաստատուած է 301 ընտանիք՝ ընդհանուր առմամբ 1206 մարդ:

Ուչարը յայտարարած է, որ այժմ ծրագրուած է 268 թուրք-մեսխեթցի (72 ընտանիք) տեղաւորել Պիթլիսի Ահլաթ շրջանին մէջ, ինչպէս նաեւ մինչեւ օգոստոսի վերջը Ուզումլուի մէջ տեղաւորել նաեւ 108 ընտանիք: Անոր խօսքերով՝ թուրք մեսխեթցիները ինքնաթիռով կը տեղափոխուին Մուշ, հոնկէ ալ՝ Ահլաթ:

Յիշեցնենք, որ մեսխեթցի-թուրքերը կամ թուրք-մեսխեթցիները թրքալեզու մահմետականներ են, որոնք բնակած են Խորհրդային Վրաստանի հարաւային հատուածին մէջ (Մեսխեթ), անկէ ալ առաջացած է իրենց անուանումը։ 1944 թ. Ստալինի հրամանով 90.000 թուրք-մեսխեթցիներ՝ որպէս անյուսալի ժողովուրդ, բռնագաղթեցին Միջին Ասիա: 1999 թ. անդամակցելով Եւրոպայի խորհրդին՝ Վրաստանը պարտաւորութիւն ստանձնեց լուծելու երկրէն բռնագաղթած թուրք-մեսխեթցիներու վերադարձի հարցը։

Hayeli.am

http://horizonweekly.ca/news/details/86781