ԱՄՆ-ի առաջատար հրեական կազմակերպություններից մեկը՝ Հակազրպարտության լիգան (ADL), 1915 թ. Օսմանյան կայսրության տարածքում տեղի ունեցածը պաշտոնապես որպես ցեղասպանություն է հիշատակել, հայտնում է «Ակօս»-ը։
«Իսրայելի հետ կապերով հայտնի, ԱՄՆ-ի ամենաուժեղ հրեական կազմակերպությունը համարվող ADL-ն երկար տարիներ խուսափում էր «Հայոց ցեղասպանություն» բառակապակցությունն օգտագործելուց և Թուրքիայի օգտին լոբբինգ էր իրականացնում՝ Կոնգրեսի կողմից Հայոց ցեղասպանության ճանաչումը կանխելու նպատակով»,- գրում է «Ակօս»-ը։
Պարբերականը հիշեցնում է, որ 2005 թ. դեռևս վարչապետ Ռեջեփ Թայիփ Էրդողանը կազմակերպության ներկայացուցիչներին պարգևատրել էր «խիզախության շքանշանով», իսկ 2016 թ. ընդունել էր նախագահական պալատում։
Ավելի վաղ հաղորդվել էր, որ ADL-ի տնօրեն Ջոնաթան Գրինբլաթը 1915 թվականի և դրանից հետո հայերի տեղահանությանն ու կոտորածներին «ցեղասպանություն» բնութագրումն էր տվել և դատապարտել դրա ժխտումը։
«1915 թվականից սկսած Օսմանյան կայսրության հայերի նկատմամբ տեղի ունեցածը ցեղասպանություն էր։ Իշխողները հարյուրավոր հայ մտավորականների ձերբակալեցին ու սպանեցին։ Այդ դեպքից հետո հայ ընտանիքները մահվան երթի ուղարկվեցին։ Հայ ժողովուրդը տեղահանության, թալանի, առևանգումների, տանջանքների, սովամահության դատապարտվեց։ Լռելն ընտրություն չէ»,-գրել էր նա։
ԱՄՆ-ի հայտնի հայ փաստաբաններից, Հայ փաստաբանների միության նախկին ղեկավար Էդվին Մինասյանն «Ակօս»-ի հետ զրույցում մեկնաբանել է այդ փաստը։ «Թե՛ իրավական, թե՛ մասնագիտական առումներով միմյանց մոտ ոլորտներում ամենամոտը հրեաների ու հայերի երկխոսությունն է, որն արդեն նաև կառուցողական դաշտ է տեղափոխվել։ Սրանից հետո Կոնգրեսում Ցեղասպանության և փոխհատուցման մասին բանաձևերում ADL-ի և նման միությունները պետք է ոչ թե խոչընդոտեն, այլ աջակցեն միմյանց»,-ասել է նա։
Leave a Reply