Գերմանիան եւ ԵՄ-ն չպետք է ենթակա լինեն շանտաժի Էրդողանի կամ Պուտինի կողմից. Ջեմ Օզդեմիրը՝ NEWS.am-ին

Գերմանիայի Բունդեսթագը հունիսի 2-ին կքննարկի Հայոց ցեղասպանության մասին բանաձեւը։ NEWS.am-ը զրուցել է խորհրդարանի Կանաչներ խմբակցության առաջնորդ Ջեմ Օզդեմիրի հետ, որը հանդես է եկել այդ բանաձեւի նախաձեռնությամբ։

1.Ինչպես գիտենք, հունիսին Բունդեսթագը քննարկելու է Հայոց ցեղասպանության մասին բանաձեւը։ Վերջին անգամ Կանաչները խորհրդարանում բուռն քննարկումներից հետո իրենց նախագիծը հետ կանչեցին վերամշակման համար։ Հիմա կոնկրետ ի՞նչ փոփոխությունների մասին է խոսքը, եւ նշվա՞ծ է արդյոք բանաձեւում ցեղասպանություն բառը։

Երբ մենք փետրվարի վերջին Բունդեսթագում վերջին անգամ քննարկում էինք Հայոց ցեղասպանության թեման, ՔԴՄ/ՔՍՄ խմբակցության ղեկավար Ֆոլքեր Քաուդերն ինձ ձեռքսեղմումով վստահեցրեց, որ մենք հանդես կգանք համատեղ հայտարարությամբ։  Այդ ժամանակ մենք հստակեցրեցինք, որ այդ հայտարարությունում լինելու են հետեւյալ կետերը. 1. Այո, դա ցեղասպանություն էր։ 2. Այո, Գերմանիան ունեցել է պատասխանատվության իր բաժինը։ 3. Մենք պաշտպանում ենք Հայաստանի եւ Թուրքիայի միջեւ մերձեցումը։ Այս խոստումը ուժի մեջ է եւ ընկած է միասնական հայտարարության հիմքում, որը մենք հունիսի 2-ին ուզում ենք ընդունել։

2. Դուք անձնամբ ի՞նչ ակնկալիքներ ունեք։ Այս անգամ կընդունվի՞ արդյոք բանաձեւը Բունդեսթագում։

Ես շատ լավատեսորեն եմ տրամադրված, որ այս անգամ այն քվեարկության կդրվի։ Սակայն, էլ ավելի կարեւոր է, որ մենք քվեարկենք այնպիսի բանաձեւի շուրջ, որում կոնկրետ, հստակ բառեր են նշված։ Մենք դրա շուրջ ավելի քան մեկ տարի աշխատել ենք եւ երկար բանակցել ենք։ Ես գոհ եմ, որ հիմա մենք լավ ճանապարհի վրա ենք։

3. Թուրքիան Եվրամիության մակարդակով միջամտում է Դրեզդենի սիմֆոնիկ նվագախմբի «Աղետ» համերգային նախագծին, որը նվիրված է Հայոց ցեղասպանությանը։ Գերմանիայի մշակութային խորհրդի ղեկավար Օլաֆ Ցիմերմանը հայտարարել էր, որ սա Եվրոպայի գործերին Թուրքիայի միջամտության օրինակ է։ Ձեր կարծիքով, որքանո՞վ է ուժեղ Թուրքիայի ազդեցությունը Գերմանիայի վրա, եւ ի՞նչ եք կարծում, արդյոք այդ ազդեցությո՞ւնն է պատճառը, թե ինչու Բունդեսթագը մինչեւ հիմա չի ընդունել Հայոց ցեղասպանությունը։

Տեսեք դրա արդյունքը. հայերը, արամեացիները, ասորիները, քաղդեացիները եւ Պոնտոսի հույները, որոնք ցեղասպանությունից առաջ կազմում էին Օսմանյան կայսրության բնակչության մեկ քառորդը, այսօրվա Թուրքիայում փոքրիկ մաս են կազմում։ Ինչպես էլ որ Թուրքիան անվանի այս իրողությունը, յուրաքանչյուրը կարող է ինքը սեփական պատկերը կազմել դրա մասին։ Հետեւաբար Թուրքիայի կառավարությունն իրեն ծաղրի առարկա է դարձնում, երբ փորձում է  Դրեզդենի սիմֆոնիկ նվագախմբին կամ անգամ Գերմանիայի Բունդեսթագին ճնշել, պատմության նրանց ընկալումն իր վրա վերցնել։ Ո՛չ Գերմանիան, ո՛չ էլ ԵՄ-ն չպետք է ենթակա լինեն շանտաժի այնպիսի ավտորիտար ղեկավարների կողմից, ինչպիսին Էրդողանն է կամ Պուտինը։ Դրա արդյունքը ճիշտ հակառակն է ստացվել. ավելի ու ավելի շատ մարդիկ են հետաքրքրվում ոչ միայն երբեմնի Օսմանյան կայսրությունում, այլ նաեւ այսօրվա մուսուլմանական աշխարհում քրիստոնյաների ճակատագրով։

Այս շաբաթ Դրեզդենի սիմֆոնիկ նվագախմբի ղեկավարը Գերմանիայի մշակութային այլ առաջատար գործիչների հետ Բունդեսթագին հղած նամակում կոչ էր անում ճանաչել ցեղասպանությունը։ Իմ տպավորություններով՝ «Աղետի» դեպքը Բունդեսթագում իմ այս կամ այն գործընկերներին անգամ կխթանի հունիսի 2-ին քվեարկեն մեր հայտարարության օգտին։

http://news.am/arm/news/328235.html