Գերմանիայում Ձախերը կպայքարեն Հայոց ցեղասպանության ճանաչման համար

ՀԱՅԿԱՆՈՒՇ ԱԼՈՅԱՆ

«Հայոց աշխարհ» օրաթերթ

Արեւմտահայոց հարցերի ուսումնասիրության կենտրոնը հանդիպում էր կազմակերպել Հայաստան այցելած Գերմանիայի Ձախեր (Die Linke) կուսակցության անդամ, Համբուրգ նահանգի խորհրդարանի պատգամավոր Մարտին Դոլցերի եւ Հայոց Ցեղասպանության ճանաչման համար պայքարող, նույն կուսակցության անդամ, գերմանաբնակ թուրք մտավորական Հասան Բուրգուջուօղլուի հետ:

Վերջիններս տեղեկացրին, որ արդեն տասը տարի աշխատում են Գերմանիայի խորհրդարանում Հայոց ցեղասպանության հարցի արծարծման համար ու հունիսի 2-ին նախատեսված Հայոց ցեղասպանության ճանաչման մասին նախագծի քննարկումը համարում են կարեւոր քայլ:

Մարտին Դոլցերը նշեց, որ սա փոքր, սակայն նշանակալից քայլ է, որը շարժիչ ուժ կհանդիսանա ու կլինի ապագայում արվելիք քայլերի սկիզբը: Վերջինս, սակայն, նշեց, որ շատ մեծ հույսեր չի կապում հունիսի 2-ի քննարկման հետ. «Գերմանիայի եւ Թուրքիայի ռազմական համագործակցությունը սկսվել է դեռ շատ վաղուց, ու չեմ կարծում, թե Գերմանիան կդիմի այնպիսի քայլի, որը կարող է նեղացնել իր դաշնակցին: Ցավալի է, բայց փաստ, որ տվյալ դեպքում Գերմանիան հրաժարվում է իր մեղսակցությունն ընդունել: Դա իր բացատրությունն ունի. չէ՞ որ սեփական մեղքն ընդունելով` Գերմանիան ստիպված կլինի ճանաչել նաեւ Թուրքիայի հանցանքը ու դատապարտել այն: Բացի այդ բազմաթիվ ճնշման մեխանիզմներ գոյություն ունեն` թուրքերի մեծաքանակ սփյուռքը Գերմանիայում, միգրանտներով Եւրոպային սպառնալու Թուրքիայի քաղաքականությունը ու, ինչպես նշեցի, բազմամյա ռազմական համագործակցությունը երկու երկրների միջեւ»:

Մարտին Դոլցերն ասաց նաեւ, որ իրենք բոլոր հնարավորին միջոցներով փորձում են աշխատանքներ տանել նաեւ Գերմանիայում բնակվող թուրք բնակչության հետ, որի մի մասն ընդունում է Ցեղասպանության իրողությունը, բայց քիչ չեն նաեւ Էրդողանի համակիրները, որոնք կատաղի պայքար են մղում Ցեղասպանության ճանաչման դեմ:

Ձախեր կուսակցության անդամ, ազգությամբ թուրք Հասան Բուրգուջուօղլուն նշեց, որ իր պարտքն է համարում պայքարել ժողովրդավարական Թուրքիայի համար, իսկ այդպիսին դառնալու համար Թուրքիան պարտավոր է ընդունել սեփական մեղքն ու վարձահատույց լինել հայերին:

Վերջիններս տեղեկացրեցին նաեւ, որ Արցախ են այցելելու եւ բացարձակապես մտահոգված չեն Ադրբեջանի սեւ ցուցակում հայտնվելու հեռանկարով:

«Հայոց աշխարհի» այն հարցին, որ միջազգային հանրությունը ԵԱՀԿ-ում այս տարի նախագահող Գերմանիայի հետ հույսեր են կապում Լեռնային Ղարաբաղի խնդրի կարգավորման վերաբերյալ, ու արդյո՞ք իրենք պատրաստվում են Գերմանիայի խորհրդարանում բարձրաձայնել Ադրբեջանի կողմից իրականացված ռազմական հանցագործությունների մասին, Մարտին Դոլցերը պատասխանեց.

«Գիտեք, բավականին դժվար հարց է, քանի որ Գերմանիան, հանդիսանալով Թուրքիայի դաշնակիցը, որոշակի առումով չի կարող Ադրբեջանի դեմ հանդես գալ, քանի որ բոլորն էլ պարզ գիտակցում են, որ Ադրբեջանը Թուրքիայի շարունակությունն է: Ցավալի է, բայց փաստ, որ Գերմանիայի իշխանությունները, փոխանակ առաջնային համարելու մարդու իրավունքները, առաջնայնությունը տալիս են քաղաքական կամ ռազմական համագործակցություններին ու դրանք դարձրել են արտաքին քաղաքականության իրենց հիմնական ուղղությունը: Մենք զեկուցելու ենք մեր կուսակցության վերնախավին մեր բոլոր հանդիպումների մասին, ինչպես նաեւ` տրամադրելու ենք նրանց Ադրբեջանի կողմից ապրիլսկզբյան ռազմական բախումների ժամանակ ադրբեջանցիների իրագործած ռազմական հանցագործությունների փաստերը: Դրանք մեզ են փոխանցվել Հայաստանի խորհրդարանականների կողմից»:

Բանախոսները վստահեցրին, որ ամեն ինչ անելու են, որպեսզի գերմանական հասարակությանը տեղեկացնեն ու հասցնեն Հայոց ցեղասպանության մասին իրականությունն ու պայքարելու են դրա ճանաչման համար:

Armworld.am