Երկրաշարժից ավերվել է Քղիի վերջին հայկական եկեղեցին

Քղի գավառի Աչըքգյունեյ (Սիվգելիք) գյուղի Սուրբ Փրկիչ հայկական եկեղեցին լրջորեն վնասվել է անցյալ տարվա դեկտեմբերին տեղի ունեցած երկրաշարժից: 2015 թ. դեկտեմբերի 3-ին 5.5 մագնիտուտ ուժգնությամբ երկրաշարժից տուժել են նաև հիշյալ գյուղի 35 տներ: Այդ մասին հաղորդում է Akunq.net-ը` հիմնվելով թուրքական լրատվամիջոցների տեղեկատվության վրա:

Ըստ աղբյուրի` գյուղի հայկական անվանումը Սերկևիլ է: Թուրքիայի Հանրապետության հռչակումից հետո սույն գյուղի անունը ևս թուրքացվում է և նախ վերածվում Սիվգելիքի, ապա` դառնում Աչըքգյունեյ:

Գյուղի Սուրբ Փրկիչ հայկական եկեղեցին կառուցվել է 1139 թվականին, իսկ 1867 (1870) թ.` վերականգնվել կարինցի (էրզրում) Կարապետ աղա Մուրադյանի և նրա բարեգործ տիկնոջ` Հուղիսայի միջոցներով: Մինչև 1915 թ. Ցեղասպանությունը եկեղեցու հարևանությամբ գործել է նաև հայկական դպրոց:

Աղբյուրի համաձայն` գյուղում մինչ օրս հավատում են, որ լուսնոտությամբ տառապող հիվանդներին հնարավոր է բուժել սույն եկեղեցում գտնվող անկողնում:

Akunq.net