«Անհրաժեշտ է, որ Գերմանիան ընդունի Հայոց ցեղասպանության հարցում իր պատասխանատվությունը». Մարտին Դոլզեր

Այսօր Արևմտահայոց հարցերի ուսումնասիրության կենտրոնում հանդիպում կայացավ Գերմանիայի Ձախեր (Die Linke) կուսակցության անդամ, Համբուրգ նահանգի խորհրդարանի պատգամավոր Մարտին Դոլզերի և Հայոց ցեղասպանության փաստը ճանաչող գերմանաբնակ թուրք մտավորական, նույն կուսակցության ներկայացուցիչ, Ալթոնայի քաղաքապետարանի խորհրդի անդամ Հասան Բուրգուջուօղլուի հետ: Ստորև ներկայացնում ենք Մարտին Դոլզերի ելույթը.

«Թանկագի՛ն տիկնայք և պարոնայք,

Նախ հարկ է ընդունել և շեշտել, որ հայերի դեմ իրագործվածը ցեղասպանություն է:

Անհրաժեշտ է, որ Գերմանիան ընդունի այս հարցում իր պատասխանատվությունը, քանի որ բազմաթիվ գերմանացի սպաներ ու զինվորներ էին մասնակցել Ցեղասպանությանը: Եվ Գերմանիան նախընտրել էր համագործակցել Էնվեր ու Թալեաթ փաշաների ռեժիմի հետ:

Բազմաթիվ քաղաքացիական-հասարակական կազմակերպություններ զեկույցներ էին ներկայացնում` ցեղասպանական բնույթ կրող այդ արյունալի կոտորածների վերաբերյալ, բայց Գերմանիայի ռեյխկանցլերն ասում էր, որ ավելի կարևոր էր Թուրքիայի հետ պատերազմին մասնակցելը, քան` հայերին պաշտպանելը:

Անհրաժեշտ է` Թուրքիան ընդունի, որ ցեղասպանություն է գործել: Անընդունելի է, որ այնպիսի պատասխանատուներ, ինչպիսին է, օրինակ, Ռեջեփ Թայիփ Էրդողանը, ուրանան այս հարցում Թուրքիայի պատասխանատվությունը: Թուրքիան շարունակելով գրգռիչ արտահայտություններ անել հայերի վերաբերյալ` կոտորածներ և ցեղասպանություն է սկսում նաև քրդերի դեմ:

Գերմանիայի Ձախ կուսակցությունը (Die Linke-ն) բազմիցս հանդես է եկել Բունդեսթագում, որպեսզի Գերմանիան ընդունի իր պատասխանատվությունն այս հարցում: Եվ մենք հուսով ենք, որ մեր խորհրդարանը 2016 թ. հունիսի 2-ին որոշում կկայացնի` հօգուտ Ցեղասպանության ճանաչման:

Մենք մեր ողջ էությամբ կիսում ենք հայերի ցավը: Այլևս երբե՛ք Ցեղասպանությանը, այլև՛ս երբեք ֆաշիզմին»:

Ֆրանսերենից թարգմանեց Մելինե Անումյանը

Akunq.net