Թուրքիայի քաղաքացիների համար Եվրամիության հետ առանց վիզայի ռեժիմի հույսը սկսում է մարել։ Այդ մասին BBC-ին հայտնել է Թուրքիայի՝ ԵՄ հարցերով նախարար Վոլքան Բոզքըրը։
Ստրասբուրգում իր եվրոպացի գործընկերների հետ հանդիպումների արդյունքների հիման վրա նախարարը հայտնել է, որ այդ հարցի շուրջ բանակցությունները հասել են որոշիչ փուլին:
Բոզքըրի խոսքով՝ Թուրքիան «բավականին շատ բան է արել, որպեսզի առանց վիզայի ռեժիմի մասին պայմանագիրը ստորագրվի»: Սակայն ԵՄ-ն պնդում է, որ Թուրքիան ուղղումներ կատարի իր հակաահաբեկչական օրենսդրությունում: Թուրք նախարարը նշել է, որ Թուրքիան այդ քայլին չի գնա:
Հիշեցնենք, որ Թուրքիայի նախագահ Ռեջեփ Թայիփ Էրդողանն ուրբաթ «հարձակում էր գործել» Եվրամիության վրա՝ քննադատելով վիզային ռեժիմի չեղարկման վերաբերյալ համաձայնության դիմաց Անկարային իր ահաբեկչության մասին օրենքները փոխել տալու համար։
«Մենք կգնանք մեր ճանապարհով, դուք գնացեք ձեր ճանապարհով»,- ասել էր Էրդողանը՝ նշելով, որ Թուրքիան չի փոխի իր հակաահաբեկչական օրենքները ԵՄ-ի հետ առանց վիզայի ռեժիմի դիմաց:
Ավելի վաղ հաղորդվել է, որ Եվրախորհրդարանի նախագահ Մարտին Շուլցը և կառույցի քաղաքական խմբակցությունների առաջնորդները դադարեցրել են Եվրամիության կողմից Թուրքիային անայցագրային ռեժիմի տրամադրման շուրջ քննարկումը:
Վիզաների չեղարկումն Անկարայի և Բրյուսելի միջև մարտին կնքված փախստականների մասին համաձայնագրի մասն է:
Անցած շաբաթ Եվրահանձնաժողովն առաջարկել էր Եվրախորհրդարանին և ԵՄ խորհրդին վերացնել Թուրքիայի քաղաքացիների համար վիզային սահմանափակումները, եթե Անկարան մինչև հունիսի վերջ կատարի մնացյալ հինգ պայմանները:
Leave a Reply