Հնարավոր է` Թուրքիայի իշխող և ազգայնական կուսակցությունները կոալիցիա կազմեն

Թուրքական «Hürriyet» թերթի սյունակագիր, թուրք հայտնի լրագրող Ահմեթ Հաքանը հոդվածում տեսակետ է հայտնել, ըստ որի` ամենայն հավանականությամբ շուտով բոլորը ականատես կլինեն Թուրքիայում կառավարող Արդարություն և զարգացում կուսակցության (AKP-ԱԶԿ) և ընդդիմադիր Ազգայնական շարժում կուսակցության (MHP-ԱՇԿ) կոալիցիային:

Հաքանը «Ուշադրություն. սպասվում է ԱԶԿ-ԱՇԿ կոալիցիա» վերնագրով հոդվածում, մեջբերելով ԱՇԿ նախագահ Դևլեթ Բահչելիի` «Կառավարությանը ցույց տված մեր փաստացի աջակցությունը կարող է իրավական դրսևորում ստանալ» հայտարարությունը, պնդում է արել, որ Բահչելին այսպիսով հայտնել է ԱԶԿ-ի հետ կոալիցիա կազմելու ցանկություն մասին:

Ըստ նրա ունեցած տեղեկությունների` Թուրքիայի գլխավոր ազգայնականը մայիսի 11-ին կայանալիք կուսակցության գործադիր խորհրդի նիստին մտադիր է ԱԶԿ-ի հետ բանակցություններ վարելու լիազորություն խնդրել:

«Կարճ ասած, այժմ իրավիճակն այսպիսին է` հունիսի 7-ին 80 պատգամավորներով (նախորդ ընտրությունների արդյունքում ԱՇԿ-ն 80 մանդատ էր ստացել-խմբ.) չիրականացված կոալիցիան կարծես այժմ իրականանում է 40 պատգամավորով»:

Թուրք հեղինակը նշում է, որ Բահչելին իշխանության հետ կոալիցիայի գնալու 3 հավանական պատճառ ունի, որոնցից 1-ինը կուսակիցների համար արտահերթ համագումար հրավիրելու ամենահիմնավոր «ազգայնական շերտը իշխանություն է ուզում» պատճառաբանությունը վերացնելն է: 2-րդ` ճնշումների պայմաններում անցկացվելիք հաջորդ ընտրությանը մասնակցել կառավարության հետ միասին: Ըստ Հաքանի` 3-րդ պատճառն էլ այն է, որ կուսակցության ներսում իր դեմ սկսված շարժումները Բահչելին կկարողանա ճնշել կոալիցիայի արդյունքում ստացած ուժով:

«Այժմ փնտրվում է հետևյալ հարցի պատասխանը` արդյոք Էրդողանը, ով հիմա իրեն զգում է իր հզորության գագաթնակետին, դրական կարձագանքի կոալիցիոն համագործակցությանը»,- գրում է Հաքանը:

Ermenihaber.am