Թուրքիայի վարչապետ Ահմեթ Դավութօղլուի քաղաքական կարիերան սկսվեց 14 տարի առաջ՝ որպես «դիվանագիտության խորհրդատու»։ Հետո դարձավ արտգործնախարար, ապա՝ վարչապետ, գրում են «Հյուրիյեթ» պարբերականի հոդվածագիրներ Թուրան Յըլմազն ու Գիզեմ Քարաքաշը:
Դավութօղլուի վարչապետության շրջանում նախագահ Ռեջեփ Թայիփ Էրդողանի հետ նրա հարաբերություններում վերելքներ ու վայրէջքներ եղան։
Դավութօղլուն վարչապետի պաշտոնում աշխատեց 20 ամիս։ Այդ ընթացքում գրանցվեց 20 առճատակում, որոնք նրանց հարաբերությունները դեպի ճգնաժամ տարան։
Ներկայացնում ենք այդ առճակատումներից մի քանիսը.
Կոռուպցիոն սկանդալը
Դավութօղլուի պաշտոնավարման ընթացքում՝ 2013 թվականի դեկտեմբերի 17-25-ին տեղի ունեցավ կոռուպցիոն սկանդալը, որում ներքաշված էին նախկին նախարարներ Զաֆեր Չաղլայանը, Մուամմեր Գյուլերը, Էգեմեն Բաղըշն ու Էրդողան Բայրաքթարը։ Գերագույն դատարանի վճիռն Էրդողանի սրտով չէր։
Հաքան Ֆիդանի հարցը
Էրդողանի «գաղտնիքների տուփը» համարվող հետախուզության պետ Հաքան Ֆիդանը պատգամավորության թեկնածու գրանցվելու համար ազատվեց պաշտոնից։ Դավութօղլուն հաստատեց նրա հրաժարականը, սակայն Էրդողանը դեմ էր։ Արդյունքում Ֆիդանը ստիպված եղավ վերադառնալ աշխատանքին։
Ընտրացուցակի ճգնաժամը
Դավութօղլուի գլխավորությամբ 2015-ի հունիսի 7-ին և նոյեմբերի 1-ին կայացած ընտրությունների ընտրացուցակների հարցը բավական հակասություններով անցավ։
Կոալիցիոն ճգնաժամը
2015 թվականի հունիսի 7-ի ընտրություններից հետո կոալիցիա ստեղծելու ժամանակահատվածում Էրդողան-Դավութօղլու հարաբերություններում խնդիրներ եղան։ Դավութօղլուն կողմ էր կոալիցիային, սակայն տեղի ունեցավ այն, ինչ ցանկանում էր Էրդողանը՝ նոր ընտրություն։
Կառավարություն կազմելու ճգնաժամը
Ուժերի պայքար տեղի ունեցավ նաև կառավարության ցանկը որոշելու հարցում։ Էրդողանը դարձյալ իր կշիռն օգտագործեց, և այն անունները, որոնց Դավութօղլուն ջերմ չէր արձագանքում, հայտնվեցին ցանկում՝ Բինալի Յըլդըրըմ և Բերաթ Ալբայրաք (Էրդողանի փեսան-Tert.am)։
Սահմանադրության փոփոխության ժամանակահատվածը
Խնդրահարույց էր նախագահական համակարգ նախատեսող նոր սահմանադրության պատրաստման և վայրկյան առաջ այն Մեջլիսին ներկայացնելու հարցը։
Անձեռնմխելիության հարցը
Էրդողանը հաճախ հայտարարում է քրդամետ Ժողովուրդների դեմոկրատիա կուսակցության պատգամավորներին անձեռնմխելիությունից զրկելու մասին։ Սակայն Դավութօղլուն երկար ժամանակ այդ ուղղությամբ որևէ քայլ չէր ձեռնարկում։
Ահաբեկչության բնութագրումը
Էրդողանը ցանկանում էր ահաբեկչության բնութագիրը վերաձևակերպելով` փոփոխություն անել Թուրքիայի Քրեական օրենսգրքում։ Դավութօղլուն մինչ այժմ այդ ուղղությամբ որևէ քայլ չի արել։
Դյունդար–Գյուլ ճգնաժամը
Սահմանադրական դատարանը լրագրողներ Ջան Դյունդարին ու Էրդեմ Գյուլին ազատ արձակելու մասին որոշում կայացրեց, որին Էրդողանն արձագանքեց՝ ասելով. «Այդ վճիռը չեմ ընդունում և չեմ էլ հարգում»։ Դավութօղլուն ասաց, որ կողմ է լրագրողների պայմանական ազատ արձակմանը։
Օբամայի ճգնաժամը
Դավութօղլուն ԱՄՆ նախագահ Բարաք Օբամայի և փոխնախագահ Ջոն Բայդենի հետ հանդիպումը հետաձգեց։ Ասում են՝ այդ հետաձգումը պայմանավորված էր նախագահական պալատի շրջանակներում առկա մտահոգություններով։
Հիշեցնենք, որ Թուրքիայի վարչապետ Ահմեթ Դավութօղլուն օրերս հայտարարել է, որ Արդարություն և զարգացում կուսակցության արտահերթ համագումարին կուսակցության ղեկավարի պաշտոնում իր թեկնածությունը չի առաջադրելու. ըստ այդմ՝ հեռանալու է նաև վարչապետի պաշտոնից։
http://www.tert.am/am/news/2016/05/07/erdogan-davutoglu/2013135
Leave a Reply