Ցանկացած դեպք, երբ կուսակցական գործիչը ենթարկվում է բռնության, մտահոգության առիթ է մեզ համար. ԱՄՆ-ի պետդեպը՝ Կարո Փայլանի շուրջ ստեղծված իրավիճակի մասին

ԱՄՆ-ի պետդեպարտամենտում կայացած ամենօրյա ճեպազրույցի շրջանակում կառույցի պաշտոնական ներկայացուցիչ Մարկ Թոները խոսել է Թուրքիայի խորհրդարանի հայազգի պատգամավոր Կարո Փայլանի մասին:

«ԱՄՆ-ի Հայ դատի հանձնախումբը դիմել է Թուրքիայում Միացյալ Նահանգների դեսպան Ջոն Բասին` կոչ անելով հրապարակայնորեն դատապարտել Թուրքիայի խորհրդարանում հայ համայնքի ներկայացուցիչ Կարո Փայլանի նկատմամբ իրականացված հարձակումները, ինչպես նաև զբաղվել վերջինիս անվտանգության ապահովման հարցով: Դուք հետևո՞ւմ եք այս իրավիճակին, որևէ մեկնաբանություն կարո՞ղ եք անել այս հարցի շուրջ»,-հետևյալ հարցադրմամբ դիմել է լրագրողներից մեկը:

Սակայն Թոներն անկեղծորեն ասել է, որ տվյալ հարցում չի տիրապետում մանրամասն տեղեկությունների։

«Սակայն ակնհայտ է, որ ցանկացած դեպք, երբ քաղաքական կուսակցության անդամը ենթարկվում է բռնության, մտահոգության առիթ է մեզ համար: Բայց քանի որ ես այս հարցի շուրջ մանրակրկիտ տեղեկությունների չեմ տիրապետում, կհրաժարվեմ հետագա մեկնաբանություններից»,-շարունակել է Թոները:

Հիշեցնենք, որ Թուրքիայի խորհդարանի հայ պատգամավորներից մեկի՝ Կարո Փայլանի մասնակցությամբ երկրի խորհրդարանում ծեծկռտուք էր տեղի ունեցել։
Դրանից հետո Կարո Փայլանը հայտարարել էր, որ իշխող Արդարություն և զարգացում կուսակցության ներկայացուցիչները կանխամտածված իրեն թիրախ են ընտրել ծեծկռտուքի ընթացքում։

«Կարոն այստեղ է, Կարոն այստեղ է»,-միմյանց ձայն են տվել նրանք՝ ցանկանալով Լինչի դատաստանի ենթարկել նրան։

http://www.tert.am/am/news/2016/05/06/garopalyan-marktoner/2012588