Եվրամիության մշակութային ժառանգության մրցանակը ստացել է Դիարբեքիրի Սուրբ Կիրակոս հայկական եկեղեցին. Imc

Եվրամիության մշակութային ժառանգության մրցանակին արժանացել է ներկայիս Թուրքիայի Դիարբեքիր քաղաքի Սուրբ Կիրակոս հայկական եկեղեցին։ Այս մասին հայտնում է Imc լրատվական կայքը։

Մրցանակի հանձնման արարողությունը տեղի է ունեցել Պոլսո հայոց պատրիարքարանում, որին մասնակցել են Դիարբեքիրի քաղաքապետարանի համանախագահ Ֆըրաթ Անլըն, Եվրամիության Թուրքիայի հանձնաժողովի ղեկավարի տեղակալ Անդրեա Շմիդտը, Դիարբեքիրի Սուրբ Կիրակոս հայկական եկեղեցու հիմնադրամի նախագահ Էրգուն Այըքը։

Անդրեա Շմիդտն իր խոսքում նշել է, որ իրենք մտահոգ են վերջին ժամանակներում Թուրքիայի արևելյան հատվածներում, մասնավորապես Դիարբեքիրի Սուր շրջանում տեղի ունեցող զարգացումների կապակցությամբ։

Մրցանակի հանձնման արարողությանը ելույթ է ունեցել նաև Ֆըրաթ Անլըն` ասելով, որ եթե 1895թ. հայերի հանդեպ ճիշտ վերաբերմունք լիներ, տեղի չէին ունենա ոչ 1915թ. կոտորածները, ոչ էլ նմանատիպ այլ դեպքեր։

Հիշեցնենք, որ 2016թ. մարտի 25-ին Թուրքիայի նախարարների խորհրդի կայացրած որոշմամբ, ի թիվս մի քանի հազար այլ շինությունների, պետականացվեց նաև Դիարբեքիրի Սուրբ Կիրակոս հայկական եկեղեցին։

http://www.aravot.am/2016/05/06/688667/