Գերմանիայում, ի վերջո, կայացել է Հայոց ցեղասպանության զոհերի հիշատակի համերգը

Հակառակ Թուրքիայի բոլոր խոչընդոտումներին` ապրիլի 30-ին Դրեզդենում տեղի է ունեցել սիմֆոնիկ նվագախմբի կազմակերպած «Աղետ» խորագրով համերգը: Այն նվիրված է եղել Հայոց ցեղասպանության զոհերի հիշատակին:

Ըստ թուրքական «Demokrathaber.net» կայքի` համերգին մասնակցել են հայեր, թուրքեր ու գերմանացիներ: Անկարայի կողմից համերգը խոչընդոտելու ջանքերի դեմ իրենց բողոքն արտահայտող որոշ հանդիսատեսներ համերգին եկել են «Danke Dresden» (Շնորհակալություն Դրեզդեն) պաստառներով: Համերգային դահլիճի բակում ապրիլի 24-ի նվիրված ժամանակավոր լուսանկարների ցուցահանդես է բացվել:

Հիշեցնենք, որ Դրեզդենի սիմֆոնիկ նվագախմբի` «Աղետ» անվանումով համերգային նախագծին Եվրամիության կրթության և մշակույթի հարցերով գործակալությունը 200.000 եվրոյի աջակցություն էր ցուցաբերում:

Գործակալությունը նաև համերգի մասին տեղեկություններ էր տեղադրել ԵՄ կայքում: Այս ամենը հարուցել էր Թուրքիայի դժգոհությունը, ինչից հետո սկսվել էին բարձր մակարդակով ճնշումները ԵՄ-ի վրա:

Ճնշումներից ու շանտաժներից հետո ԵՄ կայքը հեռացրել էր համերգի մասին տեղեկությունները կայքից, սակայն ֆինանսական աջակցությունը չէր դադարեցրել:

Ավելի վաղ Դրեզդենի սիմֆոնիկ նվագախմբի հիմնադիր ղեկավար Մարկուս Ռինդտն էլ հայտարարել էր, որ Թուրքիայի Եվրամիության դեսպանը պահանջել է, որ ԵՄ-ն դադարեցնի նախագծին ցուցաբերվող աջակցությունը` այդ պահանջը բնորոշելով հարձակում խոսքի ազատության դեմ:

Ermenihaber.am