Հայոց ցեղասպանությունը պատմական փաստ է` անկախ նրանից, թե Թուրքիան ինչ է ասում. ամերիկացի ցեղասպանագետ

Ամերիկացի հայտնի ցեղասպանագետ Ֆրենկ Ջի Պերեսը, ով պատմություն է դասավանդում Սան Բենիտո ավագ դպրոցում, Mercury News պարբերականի համար Հայոց ցեղասպանության վերաբերյալ ուշագրավ հոդված է գրել։

«Ցեղասպանության փաստի ժխտումը բարոյապես անպատասխանատու ու վտանգավոր երևույթ է` հատկապես, երբ նման դիրքորոշումն արմատավորված է երկրի գիտակցության մեջ։ Ասվածը բնորոշ է Թուրքիային, որը 1 դարից ավելի է՝ թաղել է Հայոց ցեղասպանության մասին ճշմարտությունն ու փորձում է համոզել աշխարհին, որ իր երկրի տարածքներում այդքան մարդկանց սպանություններն իրականում տեղի չեն ունեցել: Սակայն կան անվիճելի փաստեր, որոնց հիման վրա պատմաբանները փաստել են, որ տեղի ունեցածը 20-րդ դարի առաջին ցեղասպանությունն էր»,- գրում է Պերեսը` այնուհետև ընթերցողին ներկայացնելով Օսմանյան կայսրությունում հայ բնակչության կարգավիճակի, կայսրության զարգացման գործում ունեցած ներդրման, ինչպես նաև իշխանությունների կողմից նրանց հանդեպ խտրական վերաբերմունքի ու բռնաճնշումների վերաբերյալ ստույգ պատմական փաստեր։

1908թ. Օսմանյան կայսրությունում իշխանության եկան երիտթուրքերը, որոնց կարգախոսն էր` «Թուրքիան` թուրքերի համար»։ Սկսվեց ազգայնականության զարթոնքը, որը ժամանակի ընթացքում հանգեցրեց Ցեղասպանության:

«Առաջին աշխարհամարտի ռազմաճակատում երկրի կրած անհաջողությունների համար երիտթուրքերը մեղադրում էին հայ զինվորներին ու բարձրաստիճան զինվորականներին, որոնց ավելի ուշ միտումնավոր զրկեցին զենքերից, հեռացրին ծառայությունից` կամաց-կամաց ուղի հարթելով արյունալի ծրագրի իրագործման համար»,-գրում է հեղինակը` պատմելով հայ բնակչության բռնի տեղահանումների, զանգվածային ջարդերի, բռնաբարությունների, մահվան երթերի ու Ցեղասպանության մյուս սոսկալի «բաղադրիչների» մասին:

«Այս կիրակի լրացավ Հայոց ցեղասպանության 101-րդ տարելիցը: Արդեն 1 դարից ավելի է, ինչ Թուրքիան փորձում է փակել պատմական չընդունված փաստից արնահոսող վերքերը։ Ի տարբերություն Գերմանիայի` Թուրքիան երբեք չի ընդունել իր արյունոտ անցյալը։ Այն վարում է ժխտողական քաղաքականություն, որին, ցավոք, աջակցում է նաև նախագահ Օբաման»,-նշել է ցեղասպանագետը:

Իր հոդվածը Պերեսն ավարտել է հետևյալ մտքով. «Սիրիական անապատ քշված հայ զոհերի ` արևից գունաթափված ոսկորներն առ այսօր ցաքուցրիվ են եղած այդ անջրդի հողերում` մնալով որպես կորուսյալ կյանքերի ու չընդունված ճշմարտության լուռ հիշատակ»:

http://www.tert.am/am/news/2016/04/28/frank-j-perez-genocide/2004180