Ապրիլի 23-ին Մոսկվայի հայկական եկեղեցական համալիրի «Տապան» թանգարանում կայացավ «Ռուս մտավորականությունը և Հայոց ցեղասպանությունը» թեմայով միջոցառում, որին ներկա էին ՀԱԵ Ռուսաստանի և Նոր Նախիջևանի Հայոց Թեմի առաջնորդ Տեր Եզրաս արքեպիսկոպոս Ներսիսյանը և իսրայելցի պրոֆեսոր Յաիր Աուրոնը։ Այս մասին «Հայերն այսօրին» հայտնում են Հայորդյաց տան տեղեկատվական կենտրոնից:
Միջոցառման հեղինակ՝ Մոսկվայի «Հայորդյաց տան» Հայոց պատմության ուսուցչուհի Սիլվա Գյուլիշյանը միջոցառմամբ ցանկացել էր ցույց տալ այն մտավորականին, ով կուլ չգնաց համատարած կարծիքին և փաստերն անվանեց իրենց անուններով՝կանգնելով հայ ժողովրդի կողքին։
«Անգամ միայն ռուս մտավորականության վկայությունները բավական են ոճրի ահռելիությունն ու սարսափը պատկերելու համար։ Հենց նույն մտավորականությունը փաստեց, որ ոճիրն իրականացվեց հայի պատմական հողում, գերտերությունների աչքի առաջ և լուռ համաձայնության հանգեցնող անտարբերությամբ։
Սակայն այդ տերությունների անհատ ներկայացուցիչներն էին, ովքեր չցանկացան աչք փակել կոտորածների վրա, այլ գրեցին, հրապարակեցին, պահանջեցին՝ դառնալով արժեքավոր աղբյուր իրենց իսկ ազգի՝ տարիներ հետո ծնվելիք զավակների համար»,- նշեց Սիլվա Գյուլիշյանը՝ հավելելով, որ նրանց շարքերում էին՝ Յուրի Վեսելովսկին, Անտուան Բերեզովսկի-Օլգինսկին, Ալեկսեյ Կոլմակովը, Վալերի Բրյուսովը և այլք։
Միջոցառման ավարտին Տեր Եզրաս արքեպիսկոպոս Ներսիսյանն իր օրհնությունը փոխանցեց միջոցառման մասնակիցներին՝ ասելով, որ հենց նրանք պետք է արդար դատի պահանջատերերը լինեն։
«Ռուս մտավորականությունը և Հայոց ցեղասպանությունը» խորագրով միջոցառման ժամանակ եղան նաև երաժշտական համարներ՝ «Հայորդյաց տան»՝ «Oվսաննա» երգչախմբի ղեկավար Լենա Բեգլարյանի, «Հրաշացան» ազգագրական համույթի ղեկավար Արմինե Մարտիրոսյանի և կրթօջախի սան Մարիամ Պրազյանի կատարմամբ։
Միջոցառումից հետո «Տապան» թանգարանի տնօրեն Աշոտ Ավետիսյանը հանդիսատեսին ներկայացրեց «ցեղասպանություն» տերմինի ծագումնաբանությունը՝ միաժամանակ անդրադառնալով Հայոց ցեղասպանության իրականացման փուլերին և դրդապատճառներին։
Hayernaysor.am
Leave a Reply