Թուրքիայի հայ պատգամավորները մեկնաբանել են Էրդողանի ապրիլքսանչորսյան ուղերձը

Թուրքիայի խորհրդարանի հայ պատգամավորները մասնակցել են Ստամբուլի Սուրբ Աստվածածին հայկական եկեղեցում Հայոց ցեղասպանության զոհերի հիշատակին նվիրված պատարագին։

Միջոցառմանը ներկա են եղել Ստամբուլից ընտրված Ժողովրդահանրապետական կուսակցության պատգամավոր Սելինա Դողանը, Ժողովուրդների դեմոկրատիա կուսակցության ներկայացուցիչ Կարո Փայլանը և Արդարություն և զարգացում կուսակցության ներկայացուցիչ Մարգար Եսայանը։

Ինչպես տեղեկացնում է «Ակօս»-ը, պատարագից հետո պատգամավորները մեկնաբանել են Թուրքիայի նախագահ Ռեջեփ Թայիփ Էրդողանի ապրիլքսանչորսյան ուղերձը։

Հիշեցնենք, որ Ռեջեփ Թայիփ Էրդողանն իր խոսքում հիշատակել էր բոլոր «այն օսմանցի հայերին», ովքեր կյանքից հեռացել են, և ցավակցել է նրանց թոռներին ու ծոռներին: «Անկախ նրանց էթնիկ և կրոնական ծագումից՝ ես նաև հարգում եմ բոլոր այն օսմանյան քաղաքացիների հիշատակը, որոնք կյանքից հեռացել են այդ նույն ժամանակաշրջանում»,-ասել էր նա:

Էրդողանը նաև անդրադարձել էր հայերի ու թուրքերի համատեղ ապրելու մշակույթին, որն, ըստ նրա, մոտ 1000 տարվա պատմություն ունի։ «Մենք կիսում ենք այդ ընդհանուր ցավը: Ինչպես նաև ուզում եմ շնորհակալություն հայտնել բոլոր այն հայ քաղաքացիներին, ովքեր իրենց ներդրումն են ունեցել մեր երկրի կյանքում՝ ինչպես անցյալում, այնպես էլ ներկայում»,- ասել էր նա։

ԺՀԿ պատգամավոր Սելինա Դողանը, մեկնաբանելով Էրդողանի հայտարարությունը, նշել է, որ այս տարի, նախորդ տարիների համեմատ, «Թուրքիան հետ է գնացել»։

Նա նշել է, թե Ստամբուլում «Հեծանվային արշավ» է տեղի ունեցել հենց ապրիլի 24-ին, ինչի համար փակվել են ճանապարհներն ու շատերը չեն կարողացել եկեղեցի գալ։

«Նախագահի՝ ցավակցական ուղերձը դրական եմ համարում։ Մաղթում եմ, որ երկու ազգերի մերձեցման քաղաքական գործընթացը շարունակվի՝ առանց Հայաստանի դեմ որևէ պայմանի։ Ցանկանում եմ անկողմնակալ, բարեկամաբար, խաղաղ ապրենք այս երկրում և առերեսվենք ցավերին։ Մաղթում եմ, որ Թուրքիայի ազգային մեծ ժողովում այդ թեմայով առողջ քննարկում տեղի ունենա»,- ասել է նա։

Քրդամետ Ժողովուրդների դեմոկրատիա կուսակցության ներկայացուցիչ Կարո Փայլանը ևս անդրադարձել է ապրիլի 24-ին հեծանվարշավ կազմակերպելու կառավարության նախաձեռնությանը։

Նա նաև մատնանշել է, որ անցյալ տարվա միջոցառմանը նախարար, պատգամավորներ էին մասնակցել, իսկ այս անգամ՝ ոչ։

«Մեզ անտեսող կառավարություն կա։ Երբ գալիս էի, ճանապարհները փակ էին, հեծանվարշավ էր։ Այդ ամենն ապրիլի 24-ին էր զուգադիպել։ Անցյալ տարի էլ նույն օրը նախագահականը Չանաքքալեում մեկ այլ միջոցառում էր նշանակել։ Այս տարի տեսան, որ դա անհեթեթություն է, հեծանվարշավ դրեցին»,-ասել է նա։

Փայլանը հիշեցրել է, որ մինչև 1915-ը հայերն այդ տարածքում 5-ից մեկն էին։ «Ամեն հինգ մարդուց մեկը հայ էր, և ամեն հինգ մարդուց մեկը ոչնչացվեց։ Այսօր մենք փոքրամասնություն ենք։ Այսօր նախագահականը հեծանվարշավ է անում այս օրը»,-ասել է նա՝ նշելով, որ ապրիլի 24-ը պետք է կարևորվի նաև Թուրքիայում։

Էրդողանի կուսակից, Արդարություն և զարգացում կուսակցությունից ընտրված պատգամավոր Մարգար Եսայանը կարևորել է նախագահի ուղերձը։

«99-րդ տարելիցին այն ժամանակ դեռ վարչապետ Ռեջեփ Թայիփ Էրդողանն առաջին ցավակցական ուղերձը հղեց։ Դա պատմական բեկում էր։ Այսօրվա ցավակցական ուղերձը՝ նույնպես»,-ասել է նա։

«99-րդ տարելիցի ժամանակ, երկար տարիների ընդմիջումից հետո, 1915 թվականի ապրիլի 24-ին կորցրած մեր պապերի հիշատակին կարողացանք պատարագ մատուցել։ Դա արեցինք առանց վախենալու, օրինական ճանապարհով՝ կառավարության թույլտվությամբ։ Կարծում եմ, որ դա հայերի սգին վերջ տալու, հայերի և թուրքերի, Հայաստանի և Թուրքիայի միջև, Թուրքիայի և սփյուռքի համար նոր հնարավորություններ է ստեղծում»,-ասել է նա՝ համոզմունք հայտնելով, որ այն կնպաստի երկու ազգերի, պետությունների միջև կանխակալ վերաբերմունքի նվազմանը։

http://www.tert.am/am/news/2016/04/25/erdogan/2000807