Շվեդիայի՝ ազգությամբ թուրք, հայատյաց հայտարարությունների հեղինակ նախարարն ազատվեց աշխատանքից

Երեկ Շվեդիայի վարչապետ Ստեֆան Լյովենը հրավիրված արտակարգ մամուլի ասուլիսի ժամանակ հայտարարել է Շվեդիայի քաղաքաշինության նախարար ազգությամբ թուրք Մեհմեթ Քափլանի պաշտոնանկության մասին։

Իր ելույթում վարչապետը նշել է, որ նախարարը պետք է կարողանա ներկայացնել Շվեդիան` առանց որևէ կասկած հարուցելու։
ՀՀ ԱԳՆ լրատվական ծառայության փոխանցմամբ՝ այս քայլով Շվեդիայի կառավարությունը արձագանքեց վերջին շաբաթվա ընթացքում Շվեդիայում հասունացած ներկառավարական ճգնաժամին, այն բանից հետո, երբ «Էքսպրեսեն» օրաթերթը տպագրեց Քափլանի լուսանկարը, որում նա ճաշում է վերջերս Ստոկհոլմում թուրք-ադրբեջանական ցույցի ժամանակ հայատյաց հայտարարությունների հեղինակ Բարբարոս Լեյլանիի և «Գորշ գայլեր» կազմակերպության շվեդական թևի ղեկավար Իլհան Սենթուրքի հետ։

Նախարարի և իսլամիստների ու ազգայնականների միջև բացահայտված կապը սուր քննադատության ենթարկվեց թե՛ կառավարության ներկայացուցիչների, թե՛ ընդդիմության և թե՛ հանրության կողմից: Լրատվամիջոցները վերստին հիշեցին մի քանի տարի առաջ Քափլանի արած հայտարարությունը, որով նա Սիրիա մեկնող մուսուլման մարտիկներին համեմատում էր սովետա-ֆիննական պատերազմում ֆիններին օգնող շվեդների հետ:

Վերստին հրապարակվեց 2009թ. Շվեդիայի թուրքական միություններից մեկում Քափլանի ելույթի տեսագրությունը, որտեղ նա Իսրայելի կողմից պաղեստինցիների նկատմամբ վարվող քաղաքականությունը համեմատել էր նացիստական Գերմանիայում հրեաների նկատմամբ իրականացվող քաղաքականության հետ:

Այն բանից հետո, երբ ընդդիմությունից սկսեցին Քափլանի անվստահության հարցը խորհրդարանում բարձրացնելու սպառնալիքներ հնչել, վարչապետ Լյովենը կառավարության հեղինակության անկում չթույլատրելու նպատակով ազատեց Քափլանին:

Ըստ Շվեդիայի կառավարության պաշտոնական էջում հրապարակված հայտարարության՝ Շվեդիայի քաղաքաշինության ոլորտի համակարգումը ժամանակավորապես կստանձնի Ֆինանսական շուկաների նախարար Պեր Բոլունդը, իսկ ինֆորմացիոն տեխնոլոգիաների ոլորտը, որը նույնպես համակարգում էր Քափլանը, կանցնի Գործարարության և նորարարության նախարար Միքայել Դամբերգին։

Հիշեցնենք, որ մինչ 2014թ. բնակարանաշինության նախարար նշանակվելը Մեհմեթ Քափլանը եղել է խորհրդարանում կանաչների խմբակցության ղեկավարը, զբաղեցրել է Շվեդիայի մուսուլմանական խորհրդի (2005-2006թթ.), ինչպես նաև Շվեդիայի երիտասարդ մուսուլմաններ կազմակերպության (2000-2002թթ.) խոսնակի պաշտոնը։ Մեհմեթ Քափլանն աչքի էր ընկնում Շվեդիայի թուրքական և ադրբեջանական համայնքի տարատեսակ ձեռնարկներին սատարելով։

Վերջինիս հովանավորությամբ 2011թ. հոկտեմբերի 10-ին Շվեդիայի խորհրդարանի օրակարգ էր մտցվել ԼՂ հակամարտության վերաբերյալ հակահայկական բանաձևը, որը Շվեդիայի խորհրդարանում բարեկամ պատգամավորների շնորհիվ արագ կասեցվել է։ Քափլանը նաև եղել է Շվեդիայի խորհրդարանի կողմից Հայոց ցեղասպանության բանաձևի ընդունման ակտիվ ընդդիմախոս:

Hayernaysor.am