Կոլորադոյի մէջ Ցեղասպանութեան ոգեկոչում եւ Հայ Դատի օր

ԴԵՆՎԸՐ.- 2016ի Ապրիլի 22ին, ուրբաթ օրը, Կոլորադոյից համայնքի անդամներն ու գործիչները կը միանան Կոլորադոյի նահանգային օրէնսդիրներին, Ամերիկայի Հայ Դատի յանձնախմբի Արեւմտեան շրջանի ներկայացուցիչներին եւ Կոլորադոյի հայեր կազմակերպութեանը՝ ոգեկոչելու Հայոց Ցեղասպանութեան 100+1 ամեակը, նահանգի կառավարութեան կենդրոնում: Նոյն օրը, Հայ Դատի յանձնախումբը կ՛անցկացնի Կոլորադոյում Հայ Դատի Օր նախաձեռնութիւնը, որը հնարաւորութիւն կ՛ընձեռի համայնքի անդամներին՝ հանդիպելու նահանգի օրէնսդիրներին եւ մասնակցելու խորհրդարանի շէնքում նախատեսուած ձեռնարկներին:

«Ուրախ ենք, որ նման հարթակ ենք առաջարկում Կոլորադոյի մեր հաստատուն համայնքին՝ նրանց համար անմիջական կապ ստեղծելով իրենց ներկայացուցիչների հետ: Արցախի անվտանգութեան հարցը, Ալիեւի շարունակուող անվերահսկելի ատելութիւնն ու պատերազմի մղումը որպէս առաջնահերթութիւն ունենալով՝ այժմ քան երբեւէ չափազանց կարեւոր է, որ խաղաղութեան ձայները Ադրբեջանին հաշուետու դարձնեն պատերազմում գործած յանցագործութիւնների եւ հրադադարի շարունակական խախտման համար», յայտնել է Ամերիկայի Հայ Դատի յանձնախմբի Արեւմտեան շրջանի գործադիր տնօրէն Էլէն Ասատրեան:

«Մեր նախաձեռնած Հայ Դատի Օր ձեռնարկի նպատակն է տեղեկացնել մեր օրէնսդիրներին ամերիկահայ համայնքի համար կարեւորութիւն ունեցող հարցերի մասին, միաժամանակ՝ լիցքաւորել մեր գործօն անդամներին: Նրանք կը վերադառնան իրենց համայնքները՝ լաւագոյնս տեղեկացուած եւ նոր հմտութիւններով, մնալով ներգրաւուած քաղաքական հարցերում՝ հետամուտ լինելու մեր հաւաքական հարցին եւ մեր համայնքների զարգացմանը: Մենք խրախուսում ենք նահանգում մեր համայնքի բոլոր տարիքային խմբերի ներկայացուցիչներին արձանագրուելու եւ միանալու Հայոց Ցեղասպանութեան 100+1 ամեակի ոգեկոչման արարողութիւններին, եւ Հայ Դատը ներկայացնելու Կոլորադոյի նահանգային խորհրդարանում», յաւելել է Ասատրեան:

Օրուան ձեռնարկների ընթացքում տեղի կ՛ունենան քննարկումներ համայնքի հետ, Հայոց Ցեղասպանութեան ոգեկոչման արարողութիւններ՝ Ներկայացուցիչների տանը եւ Ծերակոյտում, հանդիպումներ՝ օրէնսդիրների եւ անձնակազմի աշխատակիցների հետ:

Հանդիպումների ընթացքում, Հայ Դատի Օրուայ մասնակիցներն իրենց ներկայացուցիչներին կը տեղեկացնեն Արցախի մասին, կը պատմեն Կոլորադոյի պատմութեան հպարտ էջերից մէկի մասին, երբ օգնութիւն է ցուցաբերուել Հայոց Ցեղասպանութեան ընթացքում բնաջնջուող հայերին, եւ կը ներկայացնեն ամերիկահայ համայնքին հետաքրքրող հարցեր, այդ թւում՝ Ադրբեջանի կողմից Արցախում իրականացուած պատերազմական աւերիչ յանցագործութիւնների եւ Արցախի ինքնորոշան իրաւունքի մասին:
Համայնքը կարող է արձանագրուել Ամերիկայի Հայ Դատի յանձնախմբի Արեւմտեան շրջանի կայքէջում՝ www.ancawr.org/COAdvocacyDay: Առաւել մանրամասների համար կարելի է գրել հետեւեալ հասցէին՝ simon@ancawr.org, կամ զանգահարել (818) 862-2622 հեռախօսահամարին:

Յաջորդող Կիրակի օրը, Ապրիլի 24ին, Հայոց Ցեղասպանութեան 100+1 ամեակի ոգեկոչման արարողութիւն տեղի կ՛ունենայ Կոլորադոյի նահանգային խորհրդարանի Յիշողութիւնների այգում, ժամը 12։30ին, ինչին կը հետեւի Հայ առաքելական եկեղեցու երկու Աթոռների համատեղ արարողութիւնը՝ Դենվըրի «Ֆըրսթ Բափթիս»չ եկեղեցում: 1982ից սկսած, Կոլորադոյի հայեր կազմակերպութիւնն ամէն տարի անցկացրել է զոհերի ոգեկոչման արարողութիւն՝ խորհրդարանի տարածքում:

«Անցեալ տարի կայացած 100 ամեակի ոգեկոչման ձեռնարկին, նահանգապետ æոն Հիքընլուփըրը միացաւ Կոլորադոյի հայեր կազմակերպութեան ղեկավարներին եւ համայնքին՝ մասնակցելով առաջին անգամ Ամերիկայի նահանգի մը խորհրդարանի շէնքում տեղադրուող խաչքարի բացմանը, ի յիշատակ մարդկութեան դէմ իրականացուած բոլոր յանցագործութիւնների զոհերին: Խաչքարը, Ադրբեջանի կողմից 2005ին æուլֆայում ոչնչացուած միջնադարեան 2000 տապանաքարերից մէկի կրկնօրինակն է: Ցաւօք, այս տարուայ ոգեկոչման արարողութիւնը ներառելու է նոր զոհերի, որոնք են ԼՂՀ Թալիշ քաղաքի տարեց հայ քաղաքացիները, ում դէմ ադրբեջանական ուժերը իրականացրել են պատերազմական յանցագործութիւն՝ 2016ի Ապրիլին տեղի ունեցած չորսօրեայ պատերազմի ժամանակ», նշել է Կոլորադոյի հայեր կազմակերպութեան նախագահ Սոնա Հադէշեան:

Ամերիկայի Հայ Դատի յանձնախմբի մասին առաւել տեղեկութիւնների համար, այցելէք մեր կայքը՝ ancawr.org, կամ հետեւէք մեզ «Ֆէյսբուք»ում՝ ANCA Western Region, «Ինսթըգրամ»ում եւ «Թուիթըր»ում՝ ANCA_WR:
Հայ Դատի յանձնախմբի Արեւմտեան շրջանը ամենամեծ եւ ամենաազդեցիկ կազմակերպութիւնն է Արեւմտեան Ամերիկայում: Համագործակցելով տեղական գրասենեակների, մասնաճիւղերի, աջակիցների ու համախոհ կազմակերպութիւնների հետ, Հայ Դատի յանձնախումբը ամբողջ երկրում արծարծում է ամերիկահայ համայնքի շահերը՝ բազմաթիւ հարցերի շուրջ:

Asbarez.com