Ապրիլի 18-19-ը ՌԴ Կամչատկա երկրամասում տեղի է ունենալու «Միջազգային իրավունք. խնդիրներն ու հեռանկարները» թեմայով միջազգային գիտաժողով, որը կազմակերպել են Կամչատկայի «Ռուսաստանի հայերի միությունը» և Կամչատկայի Վիտուս Բերինգի անվան պետական համալսարանը:
«Նմանօրինակ համաժողով առաջին անգամ է տեղի ունենալու Կամչատկայում: Կարծում եմ՝ Հայոց ցեղասպանության 101-րդ տարելիցին ընդառաջ համաժողովի կազմակերպումը կնպաստի ռուսաստանաբնակ հայերի ինքնության պահպանմանն ու ազգային արժեքների բարձրացմանը: Բոլորիս նպատակն է աշխարհին ապացուցել, որ մեր իրավունքների և արդար դատի պահանջատերն ենք»,- «Հայերն այսօրի» հետ զրույցում ասաց Կամչատկայի հայ համայնքի ղեկավար Արթուր Խաչատրյանը:
Համաժողովի լիագումար նիստում քննարկվելու են հետևյալ հարցերը՝
-Հայոց ցեղասպանությունը որպես միջազգային հանցագործություն և դրա հետևանքները,
-Ռուսաստանի Դաշնության և Հայաստանի Հանրապետության միջազգային իրավական հարաբերությունները. անցյալն ու ներկան,
-Միջազգային իրավունքը`լինել, թե չլինել:
Համաժողովի շրջանակում կանցկացվի նաև վարպետության դասընթաց և կլոր սեղան-քննարկում:
Հատուկ հյուրերն են լինելու իրավաբանական գիտությունների դոկտոր, պրոֆեսոր, դոցենտ, ԵՊՀ իրավագիտության ֆակուլտետի Եվրոպական և միջազգային իրավունքի ամբիոնի դասախոս, Սահմանադրական դատարանի անդամ և փոխնախագահ Վլադիմիր Հովհաննիսյանը, պատմական գիտությունների թեկնածու, դոցենտ, ՀՀ գիտությունների ազգային ակադեմիայի անդամ Հովհաննես Ալեքսանյանը, Միջազգային և Եվրոպական իրավունքի ամբիոնի դոկտոր, պրոֆեսոր, ՌԴ հանրային դատախազի պատվավոր ներկայացուցիչ Լև Լազուտինը:
Գիտաժողովին կմասնակցեն նաև դատախազներ, տարբեր համալսարաններից դասախոսներ և ուսանողներ, հասարակական կազմակերպությունների ներկայացուցիչներ:
ավելենք նաև, որ համաժողովին անդրադարձ է կատարվելու նաև Լեռնային Ղարաբաղում տիրող իրավիճակին: Մասնակիցներն ապրիլի 1-ի լույս 2-ի գիշերը ղարաբաղա-ադրբեջանական շփման գծում Ադրբեջանի կողմից հրահրած ռազմական գործողությունները դատապարտող հայտարարությամբ են հանդես գալու, որի միջոցով իրենց զորակցությունն են հայտնելու Հայաստանին և Արցախին:
Hayernaysor.am
Leave a Reply