Սերժ Թանկյանը՝ Ցեղասպանության մասին «1915» ֆիլմը Թուրքիայում հատուկ մրցանակի արժանանալու մասին

Աշխարհահռչակ System of a Down ռոք խմբի մենակատար, հանրահայտ երաժիշտ Սերժ Թանկյանը ոչ միայն իր ձայնով եւ խարիզմայով է գրավում հանդիսատեսին, այլեւ խոսքերով, որոնք ասես հնչում են ոչ թե ռոք կատարողի, այլ դասախոսի շուրթերից եւ մտորելու տեղիք են տալիս։ Եվ զարմանալի չէ, որ Թանկյանն իր վստահ քայլերն է անում նաեւ որպես երգահան եւ հիանալի ստեղծագործություններ գրում ֆիլմերի համար։

Ապրիլի 22-ին թողարկվելու է հայտնի երաժշտի նոր ալբոմը՝ նվիրված «1915» ֆիլմին, որի պրեմիերան կայացել է անցյալ տարի՝ ի հիշատակ Հայոց ցեղասպանության 100-ամյա տարելիցին։ Թանկյանը նշել է, որ ալբոմը հրապարակվելու է մեկ տարի անց, որպեսզի Ցեղասպանության եւ ֆիլմի մասին շարունակեն խոսել։

«Ինձ համար իսկապես հաճելի է ֆիլմերի երաժշտություն գրել։ Ես արդեն եւս մեկ՝ «Վերջին բնակիչը» ֆիլմի համար եմ երգ գրել։ Ամենակարեւորը սովորեցի աշխատել ռեժիսորի հետ։ Չէ որ պետք է իմանաս, թե ինչ ճաշակ եւ ուղղվածություն է նրան հարկավոր, այլապես դու ուղղակի ժամանակ կկորցնես՝ ստեղծելով մի բան, որը ֆիլմին համահունչ չի լինի։ Ես առաջին հերթին հետաքրքրվում եմ, թե ռեժիսորն ինչ երաժշտություն է փնտրում, ինչ զգացողություններ է փորձում նկարագրել, ինչ պատմություն է ուզում ներկայացնել։ Եվ հենց մենք ֆիլմի ռեժիսորի հետ ընդհանուր հայտարարի ենք գալիս, ես կարողանում տրվել գործին։ Այժմ ես նաեւ մեկ այլ աշխատանք եմ պատրաստում «100 LIVES» կազմակերպության համար։ Այն ամենամյա մրցանակ է տալիս այն հերոսին, որն անձնվիրաբար օգնում է մարդկանց՝ փրկելով նրանց ցեղասպանությունից կամ հոլոքոստից։ Ես երաժշտություն եմ գրում նաեւ այս նախաձեռնության համար»,-Billboard-ին տված հարցազրույցում նշել է Թանկյանը։

Լրագրողը նաեւ նշել է, որ Հայոց ցեղասպանությանը նվիրված «1915» ֆիլմը Թուրքիայում հատուկ մրցանակի է արժանացել, ինչին ի պատասխան Սերժն ասել է.

«Այո, լսել եմ այդ մասին, անցյալ տարի էր։ Շատ հետաքրքիր էր, բայց դա քրդական հատվածում է եղել, ինչով էլ հենց բացատրվում է, թե ինչու են նրանք ավելի զգայուն ու կարեկից եղել ցեղասպանության թեմային եւ ֆիլմին։

Թանկյանը նաեւ նշել է, թե որ ռեժիսորների հետ կցանկանար աշխատել.
«Տարանտինո, որովհետեւ նա սիրում է վտանգավոր լինել, եւ Էնիո Մարիկոնեն, ով կարծում եմ ինձ համար առաջին տեղում է։ Սակայն ես պատրաստ եմ աշխատել ցանկացած տաղանդավոր ռեժիսորի հետ»,- ասել է Սերժը։

Աշխատանքային գործունեությունից բացի, աշխարհահռչակ երաժիշտը պատմել է նաեւ, թե ինչպես է փոխվել որդու ծննդից հետո եւ ինչպիսի հայր է իր 1.5 տարեկան տղայի համար.

«Դու ավելի պատասխանատու ես դառնում։ Ընկերներս ասում են, որ այժմ ավելի զգայուն ու կենտրոնացած եմ։

Ես վայելում եմ նրա հետ անցկացրած իմ ամեն րոպեն։ Որդիս սիրում է ինձ հետ դաշնամուր նվագել, ռիթմի հիանալի զգացողություն ունի։ Նրանից ոգեշնչված՝ մի քանի երգեր եմ գրել, որոնցից մեկը ներբող է նրան»,- անկեղծորեն պատասխանել է Թանկյանը։

Պատրաստեց՝ Յանա
http://style.news.am/arm/news/30524/serzh-tankyany-cexaspanutyan-masin-1915-filmy-turqiayum-hatuk-mrcanaki-arzhananalu-masin.html