Թուրքիայի խորհրդարանի հայ պատգամավոր Կարո Փայլանը քննադատել է նախագահ Էրդողանի և վարչապետ Դավութօղլուի այն հայտարարությունները, որոնք թիրախավորում են հայկական համայնքին: Այդ մասին, ըստ Akunq.net-ի, հաղորդում է պոլսահայ «Ակօս» շաբաթաթերթի կայքը:
Աղբյուրի համաձայն` Փայլանը մասնավորապես իր վրդովմունքն է արտահայտել Էրդողանի` ապրիլի 3-ին ԱՄՆ-ի Բրուքինգս ինստիտուտում կայացած մամլո ասուլիսի ժամանակ արած այն մեկնաբանության համար, ըստ որի` իր թիկնապահները բռնություն են գործադրել իր դեմ կազմակերպված ցույցերի մասնակիցների նկատմամբ, քանի որ «այնտեղ էին նաև ԱՍԱԼԱ հայկական կազմակերպության անդամները»:
Փայլանը քննադատել է նաև Թուրքիայի վարչապետ Դավութօղլուին` փետրվարի 27-ին Բինգյոլում կազմակերպված մի հանդիպման ժամանակ նրա ունեցած ելույթի կապակցությամբ, որի համաձայն` քրդական Ժողովուրդների դեմոկրատական կուսակցությունը «հայ հրոսակախմբերի նման, համագործակցում է Ռուսաստանի հետ»:
Հայ պատգամավորը շեշտել է, որ նման արտահայտություններով նախագահն ու վարչապետը թիրախավորում են Թուրքիայի հայ համայնքին:
Akunq.net
Leave a Reply