Ստամբուլահայը գամված է եղել անկողնուն, նրան սպանել է խնամողը. Գոչունյան

Ստամբուլի Ֆաթիհի շրջանում ծեծի հետեւանքով սպանված տղամարդը ստամբուլահայ 67-ամյա Կիրակոս Քարաօղլանօղլուն է։ Այս մասին NEWS.am-ի հետ զրույցում հայտնեց Թուրքիայի «Ժամանակ» օրաթերթի գլխավոր խմբագիր Արա Գոչունյանը՝ անդրադառնալով թուրքական Aktifhaber կայքի հրապարակմանը։

Արա Գոչունյանի խոսքով՝ տեղեկությունը, թե Կիրակոս Քարաօղլանօղլուն իր տունը հասարակաց տան է վերածել եւ սպանվել է հենց հաճախորդի կողմից, իրականությանը չի համապատասխանում։

«67-ամյա այդ անձնավորությունը կաթվածահար եղած էր, գամված էր անկողնուն, խնամող ուներ։ Ըստ դեպքի հաղորդումների՝ տղամարդը խնամողի բռնությունների հետեւանքով է։ Մարդը կաթվածահար էր եղել, ինչպե՞ս կարող է կաթվածահար եղած մարդու բնակարանը հասարակաց տան վերածված լինել»,-ասաց նա։

Գոչունյանը նշեց՝ դեպքի առնչությամբ ապատեղեկատվությունը տարածվել է այն պատճառով, որ թուրքական լրատվամիջոցները քաղաքում տեղի ունեցած երկու սպանությունների մասին իրադարձությունները զետեղել են մեկ հոդվածում։

NEWS.am-ը, հղում անելով թուրքական Aktifhaber կայքին, ավելի վաղ հայտնել էր, որ Ստամբուլի Ֆաթիհի շրջանում ծեծի հետեւանքով սպանվել է Դրագոս Ք. անունով քաղաքացին, որն, ըստ թուրքական մամուլի, ազգությամբ հայ է։

Նույն աղբյուրի փոխանցմամբ՝ Ֆաթիհի շրջանում ազգությամբ հայ 49-ամյա Դրագոս Ք.-ն տունը գումարի դիմաց տրամադրել է մարմնավաճառությամբ զբաղվող Ֆաթմա Յ.-ին։ Դեպքի օրը Ֆաթմա Յ.-ի հաճախորդներից Հուսեյն Յ.-ն ծեծի է ենթարկել եւ սպանել Դրագոս Ք.-ին։

Ոստիկանությունը ձերբակալել է սպանության հետ կապ ունեցող 3 անձանց։

http://news.am/arm/news/318901.html