Նոր զարգացում` Սասունի Գոմք վանքի առնչությամբ

Դատական վճռի համաձայն` Բաթման նահանգի Սասուն գավառում գտնվող Գոմք պատմական վանքը և հայկական գերեզմանոցներն այլևս ենթակա են ոչ թե Չայըրլը, այլ` Մեշելի գյուղին: Այդ մասին հաղորդում է Akunq.net-ը` հիմնվելով «Բաթման» թերթում հրապարակված տեղեկատվության վրա:

Աղբյուրի համաձայն` 2007 թ. կադաստրային աշխատանքների ընթացքում Գոմք վանքի` Չայըրլի գյուղում գրանցվելու պատճառով տեղացի հայերի հարուցած դատական գործի քննությունն ավարտվել է: Ըստ կայացված դատավճռի` Գոմք վանքը և նրա շրջակայքում գտնվող հայկական գերեզմանները վերստին ընդգրկվել են Սասուն գավառի Մեշելի (Գոմք) գյուղում:

Սույն դատական գործը հարուցվել էր 2007 թ., Սասունի, Մուշի, Բիթլիսի հայերի միության կողմից, որի նախագահ Ազիզ Դաղջըն թերթի հետ զրույցում մասնավորապես նշել է. «Մեր կողմից եղած առարկության և տեղի ունեցած դատավարության արդյունքում Գոմք եկեղեցին և մեր մյուս պաշտամունքի վայրերն ընդգրկվել են Մեշելի գյուղի կազմում: Արդեն իսկ դա էր ճիշտը»:

Տեղի հայերը նաև ցանկանում են, որ սույն պատմական վանքում, «թեկուզ և խորհրդանշական կերպով, գեթ մեկ անգամ պատարագ մատուցվի»:

Akunq.net