Նոր ուշագրավ մանրամասներ Դինքի սպանության դատավարությունից

Պոլսահայ անվանի գործիչ, «Ակoս» թերթի հիմնադիր խմբագրապետ Հրանտ Դինքի սպանության առթիվ թուրք պետպաշտոնյաների դեմ հարուցված քրգործի շրջանակներում ուշագրավ փաստեր են ի հայտ եկել: «Ակoս»-ի թղթակից Ույգար Գյուլթեքինի հոդվածի համաձայն՝ Դինքի սպանությունից ընդամենը 3 ամիս առաջ Ստամբուլի բոլոր անվտանգության միավորներին գրավոր հրանհանգ է ուղարկվել, որով նախատեսվում էր նաև «Ակoս»-ի ներկայացուցիչների անվտանգության ապահովումը: 2006թ. հոկտեմբեր 12-ով թվագրված նշյալ գրությունում մասնավորապես ասված էր.

«Թուրքիայի հայերի պատրիարք Մեսրոպ Մութաֆյանի կողմից 2006թ. հոկտեմբերի 11-ին նահանգապետարանին է ուղղվել մի գրություն, որով պահանջվում է ապահովել Թուրքիայի հայ համայնքի բոլոր դպրոցների, հիվանդանոցների, եկեղեցիների և մնացած բոլոր կառույցների անվտանգությունը՝ հաշվի առնելով առկա բավական լարված սոցիալ-քաղաքական իրադրությունը:

Նկատի ունենալով նաև այն հանգամանքը, որ 2006 թ. հոկտեմբերի 12-ին Ֆրանսիայի խորհրդարանը ընդունեց «այսպես կոչված» Հայոց ցեղասպանության հերքումը քրեականացնող օրենք՝ խնդրում եմ վերանայել և խստացնել ավելի վաղ սահմանված անվտանգության միջոցառումները հայ քաղաքացիներին պատկանող բոլոր այն վայրերում, որոնց անունները և հասցեները նշված են կից ցուցակում, զգուշացնել բոլոր պատասխանատուներին, որպեսզի աչալուրջ լինեն, բոլոր զարգացումների մասին տեղեկացնել անվտանգության տարածքային վարչությանը և բացառել բոլոր հնարավոր խնդիրների առաջացումը»:

Գրությունն ուղարկվել է Ստամբուլի հետախուզական վարչություն, ահաբեկչության դեմ պայքարի վարչություն, նահանգապետարան և Ստամբուլի բոլոր շրջանային անվտանգության միավորներին:
Նշյալ գրությանը կից ուղարկված դպրոցների, եկեղեցիների, հիվանդանոցներ և այլ հայկական հաստատությունների ցուցակում ներառված է եղել նաև հայկական «Ակoս» թերթը: Չնայած այս ամենին՝ «Ակoս» թերթի համար որևէ անվտանգության միջոցառում չի ձեռնարկվել, և գրությունից ընդամենը երեք ամիս անց թերթի գլխավոր խմբագիրը սպանվել է հենց խմբագրատան մուտքի մոտ:
Այս առթիվ կազմված նոր մեղադրականի հիման վրա ապրիլի 19-ին դատարանի առջև կկանգնեն հետախուզական բաժնի պետ ԷՆգին Դինչը, ժամանակի Տրապիզոնի մարզային անվտանգության պետ Ռեշաթ Ալթայը, ժամանակի Ստամբուլի հետախուզական բաժնի պետ Ահմեթ Իլհան Գյուլերը՝ կանխամտածված հանցագործության անտեսման հետևանքով իրականցման մեղադրանքով, և ժամանակի Ստամբուլի մարզային անվտանգության պետ Ջելալէթթին Ջերահն ու Ստամբուլի անվտանգության բաժնի պետ Սաբրի Ուզունը՝ պաշտոնեական դիրքի չարաշահման մեղադրանքով:

Ermenihaber.am