Թուրքիան նոր գործողություններ է պատրաստում քրդերի դեմ

Թուրքիայի ներքին գործերի նախարար Էֆքան Ալան հայտարարել է երկրի հարավ-արևելյան 3 շրջաններում Քուրդիստանի աշխատավորական կուսակցության՝ PKK-ի անդամների դեմ նոր հակաահաբեկչական գործողություններ սկսելու մասին, փոխանցում է РИА Новости-ն:

Ավելի վաղ Թուրքիայի գերագույն շտաբը հայտնել է Դիարբեքիր քաղաքի Սուր շրջանում և Շըրնաք նահանգի Ջիզրե քաղաքում հակաահաբեկչական գործողությունների ավարտի մասին:

«Ութ շրջաններ մաքրվել են ահաբեկիչներից, սակայն կան նաև բարիկադներ և խրամատներ Յուքսեքոայվում, Շըրնաքում և Նուսայբինում։ Բոլոր բարիկադները կհեռացվեն։ Մենք պատրաստվում ենք այնտեղ գործողություններ սկսել անհրաժեշտ նախապատրաստություններից հետո: Դրանք սկսելու մասին բնակիչները կտեղեկացվեն»,- ասել է նախարարը:

Նա հավելել է, որ այդ շրջաններում նախատեսվում է պարետային ժամ հայտարարել։

Օրերս հրապարակվել էր տեսանյութ, որում Russia Today լրատվամիջոցի լրագրողները ցույց են տվել թուրք զինվորականների կողմից ավերված քրդաբնակ քաղաքը։ Նրանք այցելել են Թուրքիայի քրդաբնակ Ջիզրե քաղաք՝ թուրքական զինված ուժերի գործողությունից հետո, որը տևել է մի քանի ամիս։

Կադրերում երևում են հրետակոծության հետևանքով ավերված քաղաքի թաղամասերը:

http://www.tert.am/am/news/2016/03/12/turk/1959993