Մշո պատմական Սուրբ Կարապետ վանքի հողատարածքում գտնվող տներն ազատելու և վանքը վերակագնելու ուղղությամբ աշխատանքները շարունակվում են: Այդ մասին հաղորդում է Akunq.net-ը` հիմնվելով «Ակօս» շաբաթաթերթում հրատարակված տեղեկատվության վրա:
Աղբյուրի համաձայն` Սասունի, Բաթմանի, Մուշի, Վանի, Ստամբուլի և այլ շրջանների ու Սասուն գավառի գյուղերի հայերի սոցիալական փոխօգնության և մշակութային համերաշխության միության նախագահ Ազիզ Դաղջըն հայտնել է, թե իրենք ամեն բան անում են, ինչ անհրաժեշտ է Սուրբ Կարապետ վանքը վերականգնելու համար: Դաղջըն մասնավորապես նշել է. «Սուրբ Կարապետ վանքը մեծ նշանակություն ունի համայն աշխարհի հայության համար: Մեր միության հիմնադրման օրից ի վեր աշխատում ենք, որ Անատոլիայում եղած մշակութային ժառանգությունը վերադարձվի հայկական համայնքին: Բազում նախաձեռնություններով ենք հանդես եկել նաև Սուրբ Կարապետ վանքի համար: Անընդհատ խնդրագրեր ենք հղել ԹԱՄԺ-ին, Մշակույթի նախարարությանը և համապատասխան բոլոր հաստատություններին: Այդ ամենի արդյունքում տարածքն ազատելու որոշում է կայացվել: Սակայն Մուշի նահանգապետը կամայականորեն չի ենթարկվում այդ որոշմանը: Այն փաստը, որ Մուշի Չենգիլի կոչվող վայրում գտնվող Սուրբ Կարապետ վանքի տարածքում 48 տուն և 6 հարդանոց է առկա, վիրավորանք է հայերի պաշտամունքի վայրի, մեր եկեղեցու հանդեպ»:
Akunq.net
Leave a Reply