Հայերին վիրավորելու համար դատի են տվել Դավութօղլուին ու Աշքալեի քաղաքապետին

Մարդու իրավունքների պաշտպանության Ստամբուլի մասնաճյուղը դատական հայց է ներկայացրել Թուրքիայի վարչապետ Ահմեդ Դավութօղլուի ու Էրզրումի նահանգում գտնվող Աշքալեի քաղաքապետ Էնվեր Բաշարանի դեմ։

Ինչպես տեղեկացնում է Ստամբուլի հայկական «Ակօս»-ը, Մարդու իրավունքների պաշտպանության Ստամբուլի մասնաճյուղի կողմից տարածված հայտարարության մեջ նշվել է, թե Ահմեդ Դավութօղլուի ու Էնվեր Բաշարանի դեմ դատական հայցեր են ներկայացվել ժողովրդի մի հատվածին այլ կրոնի ու ազգության պատկանող ժողովրդի մյուս մասի հանդեպ ատելություն ու թշնամանք հրահրելու համար։

Հայտարարության մեջ հիշատակվել է օրեր առաջ վարչապետ Ահմեդ Դավութօղլուի խոսքերը, թե ներկայում քրդերը համագործակցում են ռուսների հետ այնպես, ինչպես դարասկզբին հայ «ավազակախմբերը» համագործակցում էին ռուսների հետ։

Հիշատակվել է նաեւ օրեր առաջ Աշքալեի քաղաքապետի կողմից կազմակերպված միջոցառումը՝ Աշքալեն հայերից «ազատագրելու» տոնակատարություններին ու դրա ընթացքում քաղաքապետի կողմից հայերի հանդեպ վիրավորական հայտարարությանը։ «Քաղաքապետը հանցանք է գործել ու հանցանք գործելու քարոզչություն իրականացրել։ Այդ միջոցառմանը ներկա են եղել բազմաթիվ երեխաներ, որոնց մոտ հայերի հանդեպ թշնամություն ու ատելություն է հրահրվել»,-նշվել է հայտարարության մեջ։

http://news.am/arm/news/315810.html