Թուրքիայում ոստիկանությունը ներխուժել է Zaman թերթի խմբագրություն

Թուրքիայի ոստիկանությունը արցունքաբեր գազ եւ ջրցան մեքենա է կիրառել Zaman թերթը արտաքին կառավարման հանձնելու որոշման դեմ պայքարող ակտիվիստների նկատմամբ եւ ներխուժել թերթի խմբագրություն:

Խմբագրության շենքի մոտ մի քանի հազար մարդ, այդ թվում Zaman թերթի աշխատակիցները, վանկարկել են «Ազատ մամուլին չի կարելի ստիպել լռել» եւ «Ձեռքերդ հեռու իմ թերթից»: Երբ ակտիվիստներին հնարավոր է եղել հեռացնել, ոստիկանությունը ներխուժել է թերթի խմբագրություն, հաղորդում է Reuters-ը:

Հիշեցնենք, որ մարտի 4-ին Ստամբուլի դատախազի միջոնորդությամբ Zaman թերթի կառավարումը փոխանցվել է պետության կողմից նշանակված արտաքին ադմինիստրացիայի: Վերջիններս սպառնում են առգրավել թերթի ունեցվածքը:

Zaman-ի գլխավոր խմբագիր Աբդուլհամիդ Բիլիչին դատարանի որոշումը համարել է Թուրքիայում «սեւ օր ժողովրդավարության համար»:

Թուրքիայի իշխանությունների գործողությունները քննադատել են արեւմտյան երկրները: Եվպորայի Խորհրդի մարդու իրավունքների հանձնակատար Նիլս Մուժնիեկսը հայտարարել է, որ Թուրքիայի գործողությունները գնահատում է որպես «ծայրահեղ լուրջ միջամտություն լրատվամիջոցների ազատությանը, որը չպետք է տեղի ունենա ժողովրդավարական հասարակությունում»:

ԱՄՆ պետքարտուղարության պաշտոնական ներկայացուցիչ Ջոն Քիրբին իրավիճակը գնահատել է «մտահոգիչ»:

Zaman-ը Թուրքիայի խոշորագույն թերթերից մեկն է, որի տպաքանակը 650 հազար է: Թուրքիայի իշխանությունների գործողությունները կապում են Ֆեթուլլահ Գյուլենի դեմ արշավի հետ, որը 1999 թվականից ապրում է ԱՄՆ-ում: 2014-ի դեկտեմբերին Գյուլենի հետ առնչություններ ունենալու հետ կապված ձերբակալվել էր Zaman-ի այն ժամանակվա գլխավոր խմբագիր Էքրեմ Դումանլին, հաղորդում է RBK-ն:

Անկարայի վարկածով, Գյուլենի կողմանկիցները 2013-ի դեկտեմբերին կոռուպցիայի մեջ մեղադրել են երկրի նախագահ Ռեջեփ Էրդողանի մտերիմներին ու նախարարներին` նպատակ ունենալով տապալել Էրդողանի իշխանությունը:

http://news.am/arm/news/315276.html