«Հայերի կողմից կոտորված թուրքերի հիշատակին» նվիրված բեմականացում` Էրզրումում

Էրզրում նահանգի (Կարին) Աշքալե գավառում կազմակերպվել է «հայերի կողմից կոտորված թուրքերի հիշատակին» նվիրված միջոցառում: Այդ մասին հաղորդում է Akunq.net-ը` հիմնվելով թուրքական «Դողան» լրատվական գործակալության հաղորդած տեղեկության վրա:

Ըստ աղբյուրի` Աշքալեի կառավարական շենքի առջև գտնվող Ստամբուլ պողոտայի վրա կազմակերպված միջոցառմանը մասնակցել են Էրզրումի քաղաքապետի պաշտոնակատար Էյուփ Թավշանօղլուն, Աշքալեի գավառապետ Մուստաֆա Հայրեթին Չիչեքը, Աշքալեի քաղաքապետ Էնվեր Բաշարանը, գլխավոր դատախազ Յավուզ Շահինը և այլ պաշտոնատար անձինք, ինչպես նաև` մեծ թվով աշակերտներ և լիցեի սաներ: Վերջիններս ընդգրկվել են նաև միջոցառման շրջանակներում կազմակերպված բեմականացման մեջ:

Բեմականացումից հետո ելույթ ունեցած Աշքալեի քաղաքապետ Էնվեր Բաշարանը, որը Թուրքիայում իշխանության ղեկին գտնվող Արդարություն և զարգացում կուսակցության անդամ է, նշել է. «Տարիներով մեր պապերի հարևանը եղած հայերը, Ռուսաստանի կողմից այս տարածքների գրավումից հետո Խորհրդային միության հրահրմամբ և ռազմական աջակցությամբ հրոսակախմբեր հիմնելով, կոտորածներ են արել մեր հողերում: Երախտագիտությամբ ենք ոգեկոչում պատմական արյամբ և դավանաճությամբ լեցուն հայերին այս հողերից պոկած և դուրս շպրտած մեր փառավոր նախնիների հիշատակը: Դավաճանության ցանց եղող այս հայ ավազակախմբերը երբեք չեն ազատվել մեր տարածքների և ազնվական թուրք ազգի նկատմամբ տածած թշնամությունից և քինախնդրությունից: Այդ հայ հրոսակախմբերը հիմա էլ ՊԿԿ-ի նման ահաբեկչական կազմակերպության միջոցով են մեր հողերում անջատողական գործունեություն ծավալում: Ռուսաստանի հետ հարաբերություններում վերջերս մեր ունեցած ճգնաժամի դեպքում ևս ակնառու կերպով տեսանք, որ այդ ուխտադրուժ ավազակախմբերը և նրանց հետ համագործակցող պետությունները երբեք չեն հրաժարվի մեր երկրի հանդեպ ունեցած իրենց չարամիտ նպատակներից»:

Հիշեցնենք, որ վերջերս նման հայտարարությամբ էր հանդես եկել նաև Թուրքիայի վարչապետ Ահմեդ Դավութօղլուն` մասնավորապես նշելով, թե «քրդերը, հայ ավազակախմբերի նման, համագործակցում են Ռուսաստանի հետ»:

Akunq.net