Դերսիմահայ կինոռեժիսորը Երեւանում է` Թուրքիայում ծպտյալ հայերի մասին պատմող իր ֆիլմով

Դերսիմահայ կինոռեժիսոր, վավերագիր Ուղուր Էգեմեն Իրեսը իր «Հոգու անարատ վիճակը» ֆիլմով Հայաստանում է:

Ֆիլմում կինոռեժիսորը ներկայացնում է իր մեծ հոր՝ Հարություն Իրեսի եւ տատի մշտական վեճերի մասին, այն բանից հետո, երբ պապը հասուն տարիքում մկրտվում է եւ բացահայտում իր ինքնությունը՝ հայ լինելը:

«Այս ֆիլմը հիմնված է տատիկիս եւ պապիկիս վեճերի վրա: Չնայած որ երկուսն էլ հայ էին, տատս պնդում էր, որ մեր ընտանիքը որպես թուրք մուսուլան է ճանաչված, իսկ պապս չպետք է բացահայտեր այդ մասին: Տատիկիս հիվանդագին այս վիճակը տասնյակ տարիներ շարունակվեց, եւ մեզ վրա այդ մտայնությունն էր ուզում տարածել, թե մենք թուրք ենք»,-այս մասին մարտի 2-ին լրագրողների հետ հանդիպմանը ասաց կինոռեժիսորը:

Կինոռեժիսորի խոսքով՝ ընտանեկան պատմության միջոցով ինքը փորձել է վեր հանել Թուրքիայում ապրող ծպտյալ հայերի խնդիրները:

«Տատիկս հիվանդագին էր ընդունում պապիս՝ արմատներին վերադառնալը, քանի որ կար հասարակության ճնշում: Մենք Թուրքիայում ենք ապրում, անգամ մեր ընտանիքների մեջ ենք ունենում այս խնդիրները եւ պրոբլեմներ չունենալու, չտուժելու համար գաղտնի ենք պահում մեր ինքնությունը: Այս ֆիլմը ընտանիքի պատմություն է եւ ընտանիքի օրինակով հասարակական իրավիճակն է ներկայացնում»,-նշեց կինոռեժիսորը:

Ուղուր Էգեմեն Իրեսը պատմեց, որ իրենից 2 տարի է պահանջվել` պապին համոզելու իր հայկական արմատների մասին պատմել:

«1915թ. իր ծնողների պատմածներն այնքան խորը հետք էին թողել պապիս վրա, որ երկար ժամանակ հրաժարվում էր դրանք պատմել, եւ սկսեցի այս վավերագրական ֆիլմի նկարահանումները»,-ասաց նա:

Հարություն Իրեսը, որը թոռան հետ Հայաստան է եկել, նշեց, որ մկրտվելը եւ իր ինքնությունը բացահայտելը դժվար է եղել, քանի որ հասարակության ճնշումներից բացի` անախորժություններ է ունեցել իր կնոջ հետ, որն ընտանիքում միակն է եղել, ով հրաժարվել է բացահայտել իր հայ լինելը:

Հարություն Իրեսը նշեց, որ Երեւանում իրեն ամեն ինչն է դուր եկել, հատկապես՝ Հայոց Ցեղասպանության թանգարանը:

«Երեկ մի քիչ շրջեցի, շատ հուզվեցի, լացս եկավ, բայցեւ հպարտ էի»,-ասաց Հարություն Իրեսը (Երիցյանը):

Նշենք, որ «Հոգու անարատ վիճակը» ֆիլմի կցուցադրվի մարտի 3-ին՝ ժամը 14:30-ին, ԵՊՀ կենտրոնական շենքում:

http://news.am/arm/news/314715.html