Հարձակում Սամսունի Ագապե եկեղեցու վրա

Սամսունում գտնվող Ագապե բողոքական եկեղեցու վրա անցյալ շաբաթ տեղի ունեցած հարձակման դեպքի կապակցությամբ 4 հոգի են ձերբակալվել: Այդ մասին հաղորդում է Akunq.net-ը` հիմնվելով «Ակօս» շաբաթաթերթում հրապարակված լուրի վրա:

Աղբյուրի համաձայն` 5 օր առաջ 4 հոգի փորձել էին բռնի կերպով ներխուժել եկեղեցի: Կասկածյալներից 26-ամյա Ալպեր Ահմեթ Յ.-ն, Սերջան Թ.-ն և Յուջել Բ.-ն, ինչպես նաև` 22-ամյա Յունուս Ս.-ն ոգելից խմիչք օգտագործելուց հետո ուղևորվել էին դեպի Բողոքական եկեղեցու միություն, և երբ դուռը չէր բացվել նրանց առաջ, փորձել էին աքացիներ տալով բացել դուռը և չկարողանալով ներս մտնել` հեռացել դեպքի վայրից:

Բողոքական եկեղեցու միության նախագահ Մեհմեթ Օրհան Բըչաքչըլարը զանգահարել է ոստիկանություն: Ոստիկանները դիտել են եկեղեցու անվտանգության տեսախցիկի միջոցով արված տեսագրությունը և հաստատել 4 կասկածյալների ինքնությունը, ապա ձերբակալել նրանց: Վերջիններիս դեմ դատական գործ է հարուցվել` «գույքի վնաս հասցնելու» մեաղդրանքով:

Կասկածյալներն առաջին ցուցմունքներում հայտնել են, որ իրենք հարբած լինելու պատճառով չեն հիշում, թե ինչ են արել:

Աղբյուրը նաև հիշեցնում է, որ Սամսունում գտնվող սույն եկեղեցու վրա հարձակման դեպքն առաջինը չէ: 10 օրվա ընթացքում երկրորդ անգամ հարձակման ենթարկված այս եկեղեցու վրա անցյալ տարվա մայիսին էլ էին հարձակում գործել:

Akunq.net