Թուրքիայի խորհրդարանում Էրդողանի պատճառով ծեծկռտուք է տեղի ունեցել

Թուրքիայի նախագահ Ռեջեփ Թայիփ Էրդողանի հայտարարությունն այն մասին, թե ազատազրկված լրագրողներին ազատ արձակելու մասին Սահմանադրական դատարանի որոշումը նա չի հարգում և հաշվի չի առնում, երկրի խորհրդարանում կռվի պատճառ է դարձել։

Հիշեցնենք, որ Թուրքիայի Սահմանադրական դատարանը վճռել էր ազատ արձակել ԻՊ-ին զենք մատակարարելու մասին բացահայտումներ արած «Ջումհուրիյեթ» թերթի երկու լրագրողներին, որոնց Էրդողանը դավաճան էր համարել։

Միջադեպը տեղի է ունեցել Թուրքիայի ընդդիմադիր Ժողովրդահանրապետական կուսակցության ու Էրդողանի Արդարություն և զարգացում կուսակցության պատգամավորների միջև։ Լեզվակռիվը վերածվել է ծեծկռտուքի։ Պատգամավորներին բաժանել կարողացել են ԺՀԿ-ից Բարըշ Յարքադաշն ու ԱԶԿ-ից Մեհմեթ Մեթիները։

Հիշեցնենք, որ լրագրողներ Ջան Դյունդարն ու Էրդեմ Գյուլն անցյալ տարվա մայիսին «Ահա և ըստ Էրդողանի գոյություն չունեցող զենքերը» խորագրով նյութ էին պատրաստել Թուրքիայի ազգային հետախուզական ծառայություններին պատկանող բեռնատար մեքենաների մասին, որոնք զենք էին մատակարարում իսլամիստներին։

Դրանից հետո պետական անվտանգության մասին տեղեկությունների հրապարակման, պետական և ռազմական լրտեսության, գաղտնի տվյալների հրապարակման և ահաբեկչական կազմակերպության քարոզչության մեղադրանքներով նախաքննություն էր սկսվել նրանց նկատմամբ։

Թուրքիայի նախագահ Ռեջեփ Թայիփ Էրդողանը «Ջումհուրիյեթին» և Դյունդարին դավաճանության համար էր մեղադրել։

Լրագրողների բանտարկությանն իրենց բողոքն արտահայտելու համար Թուրքիայի տարբեր քաղաքներում բազմաթիվ մտավորականներ, գիտնականներ, գրողներ և արվեստագետներ ցույցեր էին կազմակերպել։

http://www.tert.am/am/news/2016/02/29/erdogan-meclis/1947217