Մի քիչ ինքներդ ձեզ հարգե՛ք. էրդողանին չզայրացնելու վախը վիրավորում է Գերմանիային. Բունդեսթագի պատգամավոր

Ոչ մի արտասահմանյան պետություն չպետք է ազդեցության ունենա այն որոշումների վրա, որոնք կայացնում է Գերմանիան։ Այս մասին Գերմանիայի խորհրդարանում կայացած` Հայոց ցեղասպանության բանաձեւի թեմայով քննարկումների ժամանակ ասել է Կանաչների կուսակցության առաջնորդ Ջեմ Օզդեմիրը։

Նա հիշեցրել է, որ մեկ տարի առաջ Գերմանիայի նախագահը, Բունդեսթագի խոսնակը հայտարարեցին, որ 100 տարի առաջ Օսմանյան կայսրությունում տեղի ունեցածը Ցեղասպանություն է։ «Ուստի ես չեմ հասկանում` ինչու հնարավոր չէ կողմ քվեարկել այս բանաձեւին։ Ես գիտեմ հիմա այստեղ կհնչի այն փաստարկը, թե դրա ժամանակը չէ, բայց այս խնդրի համար արդեն 100 տարի է` հարմար ժամանակը այդպես էլ չի եկել։ Թուրքիային զայրացնելու ժամանակը չէ, ասում են այսպես կոչված ռեալպոլիտիկները։ Ձեր ռեալպոլիտիկի եւ իմի տարբերությունն այն է, որ իմը ցինիկ չէ, այլ արժեքների ռեալպոլիտիկ։ Հայերի ճակատագիրը չպիտի հաշվարկի դրվի փախստականների հարցերի հետ։ Մենք 1 տարի սպասում էինք, սպասում էինք մինչեւ կոալիցիայի խմբակցությունները պատրաստ լինեն։ Մեր խմբակցությունը սպասեց, ինչքան որ պետք էր։ Մի քիչ ինքներդ ձեզ հարգեք։ Էրդողանին չզայրացնելու վախը վիրավորում է Գերմանիայի ժողովրդավարությունը, վիրավորում է քաղաքացիական հասարակությունը»,- ասել է Օզդեմիրը։
Ձախերի խմբակցությունը իր հերթին հայտնել է, որ այս անգամ իրենք ձեռնպահ են մնալու բանաձեւի քվեարկությունից, եւ մինչեւ ապրիլի 24-ը կներկայացնեն իրենց սեփական բանաձեւը։
«Բունդեսթագը Էրդողանին չզայրացնելու համար սառեցնում է Ցեղասպանության բանաձեւը, եւ դա սկանդալ է, քանի որ Անկարան է թելադրում, թե ինչ կարելի է քննարկել այստեղ։ Բանաձեւը 2 թույլ կողմ ունի։ Առաջինը՝ պետք է հստակ ձեւակերպվի, որ հայերի ջարդերը ցեղասպանություն է։ Եվ երկրորդ՝ Գերմանիայի պատասխանատվությունը դրանում պետք է հստակ գիտակցվի, հակառակ դեպքում բանաձեւը հակակառուցողական կլինի։ Ուստի մենք ձեռնպահ կմնանք եւ ապրիլին կներկայացնենք մեր բանաձեւը»,- ասել է Ձախերի ղեկավար Սառա Վագենքնեխթը։
Հիշեցնենք, որ Գերմանիայի Բունդեսթագում տեղի ունեցած քննարկումների արդյունքում Կանաչների կուսակցության առաջնորդ Ջեմ Օզդեմիրի կողմից քննարկման դրված՝ Հայոց ցեղասպանության մասին բանաձեւը քվեարկության չդրվեց: Բուռն քննարկումներից եւ Օզդեմիրի բոցաշունչ ելույթից հետո, որին ներկա էր նաեւ Գերմանիայի կանցլեր Անգելա Մերկելը, որոշում կայացվեց բանաձեւը քվեարկության չդնել, այն հետ վերադարձնել հեղինակին՝ վերաձեւակերպելու եւ խորհրդարանի բոլոր քաղաքական ուժերի հետ համաձայնեցված, միասնական միջխմբակցական բանաձեւի տեսքով ներկայացնելու համար, որը պետք է քվեարկության դրվի մինչեւ ապրիլի 24-ը:

http://news.am/arm/news/313861.html