Բունդեսթագում Հայոց ցեղասպանության ճանաչման գործընթացը վստահաբար իր շարունակությունը կունենա. ՀՀ դեսպան

Գերմանիայի խորհրդարանում բուռն քննարկում է ծավալվել Հայոց ցեղասպանությանն առնչվող բանաձևի շուրջ: Բունդեսթագը փետրվարի 25-ի իր օրակարգում ներառել էր Հայոց ցեղասպանությանն առնչվող բանաձև, որի քննարկման առաջարկով հանդես էր եկել «Միություն 90/Կանաչներ» կուսակցությունը, որը միշտ աչքի է ընկել հայամետ բանաձևի առաջ քաշմամբ ու պնդմամբ, որ 1915-ի դեպքերը պետք է ստանան հստակ ձևակերպում, այն է՝ «Ցեղասպանություն»:

Կանաչների կուսակցության առաջնորդ Ջեմ Օզդեմիրի կողմից քննարկման դրված «Հայոց ցեղասպանության մասին» բանաձևն ի վերջո քվեարկության չդրվեց: Բուռն քննարկումներին, որին ներկա էր նաև կանցլեր Անգելա Մերկելը, որոշում կայացվեց բանաձևը քվեարկության չդնել, այն հետ վերադարձնել հեղինակին՝ վերաձևակերպելու և մինչև այս տարվա ապրիլի 24-ը քննարկելու բանաձևի նոր տարբերակը՝ խորհրդարանի բոլոր քաղաքական ուժերի հետ համաձայնեցված, միասնական միջխմբակցական բանաձևի տեսքով ներկայացնելու համար:
«Բունդեսթագում Հայոց ցեղասպանության ճանաչման գործընթացը վստահաբար իր շարունակությունը կունենա: Սրա մասին են վկայում նաև այսօր այստեղ տեղի ունեցած քննարկումները և Գերմանիայի խորհրդարանի պատգամավորների կողմից արտահայտված տեսակետները», – Tert.am-ի հետ զրույցում ասաց Գերմանիայում ՀՀ դեսպան Աշոտ Սմբատյանը և ավելացրեց, որ գերմանական հասարակության դիրքորոշումն այս հարցում արտացոլված է երկրի բարձր ղեկավարության հայտարարություններում:
«Գերմանիայի նախագահ Յոահիմ Գաուկի և խորդհրդարանի նախագահ Նորբերթ Լամերտի հայտնի հայտարարություններն արտացոլում են Հայոց ցեղասպանության հարցում գերմանական հասարակության և քաղաքական ուժերի դիրքորոշումները: Ինչպես Գերմանիայում,այնպես էլ ամբողջ աշխարհում, Հայոց ցեղասպանության ճանաչման գործընթացը անշրջելի է»,- տեղեկացրեց դեսպանը։
Հիշեցնենք որ Գերմանիայի նախագահ Գաուկը Բեռլինի Մայր տաճարում Հայոց ցեղասպանության 100-րդ տարելիցին նվիրված միջոցառմանը ելույթ ունենալիս 100 տարի առաջ Օսմանյան կայսրությունում հայերի զանգվածային կոտորածներն անվանել էր Ցեղասպանություն, իսկ խորհրդարանի նախագահ Նորբերթ Լամերտը 2015թ. մարտին հայտարարել էր, որ Օսմանյան կայսրությունում Առաջին համաշխարհային պատերազմի ժամանակ ամբողջ աշխարհի աչքի առաջ տեղի ունեցածը Ցեղասպանություն էր։
Դեսպանը հաստատեց նաև տեղեկություններն այն մասին, որ բանաձևի քննարկմանը ներկա է եղել նաև կանցլեր Անգելա Մերկելը:
«Այո հանդիպմանը ներկա է եղել նաև կանցլեր Մերկելը, ինչպես նաև` իշխող խմբակցությունների ղեկավարները»,-եզրափակեց ՀՀ դեսպան Աշոտ Սմբատյանը։

http://www.tert.am/am/news/2016/02/25/ambassy/1944416