Ստամբուլում տարեց հայ կնոջ սպանության համար մեղադրվող Մուրադ Նազարյանը ցմահ ազատազրկման է դատապարտվել

Ստամբուլի ծանր հանցագործությունների 2-րդ դատարանում ավարտվել է 2012 թվականի դեկտեմբերին սպանված տարեց հայուհի Մարիցա Քյուչուքի գործով դատավարությունը, և մեղադրյալ Մուրադ Նազարյանը ցմահ ազատազրկման է դատապարտվել։

Ինչպես տեղեկացնում է Haberler կայքը, դատական վերջին նիստի ընթացքում իր վերջին խոսքում Նազարյանը դարձյալ հերքել է իր կապն այդ սպանության հետ։

«Ես մինչ այսօր որևէ մեկի հետ անգամ կռիվ չեմ արել, այնինչ սպանության մեջ եմ մեղադրվում։ Ինձ առաջադրված մեղադրանքը ես չեմ իրականացրել։ Պահանջում եմ, որ ինձ ազատ արձակեն»,-ասել է նա։

Դատավճիռը չի գոհացրել Մարիցա Քյուչուքի դստերը՝ Պայծառ Միդիլլիին։ «Բերանդ չբացեցիր, չխոսեցիր, այժմ մենք ի՞նչ պետք է անենք։ Ամեն ինչ նրա վրա մնաց»,-ասել է նա։

Դատական նիստից հետո հայտարարությամբ է հանդես եկել նաև Քյուչուքների ընտանիքի փաստաբան Էրեն Քեսքինը։ «Մեղադրյալին վախեցնում էին, չխոսեց։ Քանի որ ապացուցվել է, որ նա այս դեպքի միակ կասկածյալը չէ։ Ակնհայտ էր, որ նա միայնակ չի գործել, սակայն կասկածյալը չխոսեց»,-ասել է Քեսքինը։

Հիշեցնենք, որ 2012-2013 թվականներին Ստամբուլի Շիշլի և Ֆաթիհ թաղամասերում միայնակ ապրող 4 տարեց կանայք հարձակման էին ենթարկվել, որոնցից 85-ամյա Մարիցա Քյուչուքը մահացել էր։

Դեպքերից հետո ձերբակալվել էր ազգությամբ հայ Մուրադ Նազարյանը, ում հոգեկան առողջության մասին բազմաթիվ մտահոգություններ էին հնչել, սակայն համաձայն դատական փորձաքննության արդյունքների՝ նա հոգեկան խնդիրներ չունի և կարող է պատասխանատվություն կրել իր քայլերի համար։

http://www.tert.am/am/news/2016/02/25/murat-nazaryan/1943387