Թուրքիայի իշխանությունների ոստիկանական գործողությունները երկրի հարավ-արեւելքում տարածաշրջանում հումանիտար աղետ են ստեղծում: Այս մասին հայտարարել է Amnesty International միջազգային իրավապաշտպան կազմակերպության Եվրոպայի եւ Կենտրոնական Ասիայի տարածաշրջանային տնօրեն Դենիս Կրիվոշեեւը, հաղորդում է «ՌԻԱ նովոստին»:
Թուրքիայի իշխանությունները դեկտեմբերին պարետային ժամ են հայտարարել երկրի հարավ-արեւելյան մի շարք քրդաբնակ շրջաններում: Սուրում շարունակվում են փողոցային բախումներն ուժայինների եւ Թուրքիայում արգելված Քուրդիստանի բանվորական կուսակցության (PKK) ապստամբների միջեւ:
Թուրքիայի ԶՈՒ գլխավոր շտաբի տվյալներով, դետեմբերի կեսերին այդ շրջաններում հակաահաբեկչական գործողությունների ընթացքում սպանվել է մոտ հազար քուրդ զինյալ: Քրդամետ Ժողովուրդների դեմոկրատական կուսակցության ներկայացուցիչները պնդում են, որ գործողությունների ընթացքում տասնյակ խաղաղ բնակիչներ են զոհվել:
«Մենք անհանգստությամբ ենք խոսում այն մասին, որ ոստիկանական գործողությունները Թուրքիայի հարավ-արեւելքում, ըստ էության, ռազմական են եւ տեղի են ունենում շուրջօրյա պարետային ժամի պայմաններում, երբ շաբաթներով մարդիկ չեն կարողանում դուրս գալ տներից: Այսպիսով, նրանք զրկված են բժշկական ծառայությունների, սնունդ հայթայթելու հնարավորությունից, ինչը հումանիտար աղետ է ստեղծում»,-հայտարարել է Կրիվոշեեւը՝ Մոսկվայում 2015 թվականին աշխարհում մարդու իրավունքների վիճակի մասին զեկույցը ներկայացնելիս:
Զեկույցում նշվում է, որ Թուրքիայում նաեւ հաճախակի են դարձել ձերբակալվածների նկատմամբ դաժան վերաբերմունքի, այլ անմարդկային եւ արժանապատվությունը ոտնահարող վերաբերմունքի մասին տեղեկությունները՝ PKK-ի դեմ ոստիկանական եւ ռազմական գործողությունների ժամանակ»:
Մասնավորապես, զեկույցում առանձնացվել են լուսանկարներ, որտեղ երեւում են, թե ինչպես են Շըրնաքի նահանգում «Հաջի Լոքման Բիրլիքի մարմինը քարշ տալիս ոստիկանական մեքենայից կապված»:
Միաժամանակ, Թուրքիայի իշխանությունների կողմից մարդու իրավունքների խախտումները մնացել են անպատիժ, ոստիկանությունը հրաժարվել է ներկայացնել կարեւոր ապացույցներ, իսկ երբ դատական գործն, այդուհանդերձ, սկսվել է, այն ընթացել է խախտումներով, պնդում են զեկույցի հեղինակները: Մասնավորապես, փաստաթղթում նշվում է, որ «բազմաթիվ դեպքերի հետաքննություն դոփել է տեղում, այդ թվում մարդկանց մահվան դեպքերը, որոնք ենթադրաբար սպանվել են ոստիկանների կողմից»:
Amnesty International-ի կարծիքով, «իրավիճակի բարելավման հույսեր ունենալու համար հիմքեր չեն երեւում»:
Իրավապաշտպանները նաեւ ուշադրություն են դարձել «ազգայնական տրամադրված ամբոխի կողմից քրդերի տների, ինչպես նաեւ քրդերի հետ առնչություն ունեցող Ժողովուրդների դեմոկրատական կուսակցության գրասենյակների հարձակումների վրա»: Նշվում է, որ ընդհանուր առմամբ, գրանցվել է շուրջ 4 հազար նման հարձակում:
Միաժամանակ, Թուրքիայի ոստիկանությունը հետապնդել ու ծեծել է լրագրողներին, որոնք լուսաբանել են երկրի հարավ-արեւելքում տեղի ունեցող իրադարձությունները, նշվում է զեկույցում:
http://news.am/arm/news/313373.html
Leave a Reply