Պատմական դպրոցի հողակտորի վրա հյուրանոց-պանդոկ է կառուցվելու

Ինչպես հաղորդում է «Ակօս» թեթի թղթակից Մ. Մանուկյանը, Կ.Պոլսի Յենիքափը թաղամասի Սուրբ Թադևոս Բարդուղիմեոս եկեղեցու հիմնադրամը 25 տարի ժամկետով վարձակալության է տվել այն հողակտորը, որի վրա գտնվում է շատ տարիներ առաջ փակված Հայկանուշյան դպրոցը:

Հիմնադրամն անցյալ տարի հունիսին «ԲՌՖ» Միջազգային լոգիստիկ ծառայության և արտաքին առևտրի սահմանափակ ընկերության հետ համաձայնագիր է ստորագրել և սպասում է, որպեսզի Հուշարձանների պահպանության խորհուրդը ծրագիրը հաստատելուց հետո գործի անցնի: Յենիքափըի Սուրբ Թադևոս Բարդուղիմեոս եկեղեցու հիմնադրամի նախագահ Մուրադ Քարամանը և ծրագրի ճարտարապետ Յուսուֆ Սերթքայան 25 տարի շարունակ «կատարիր-գործադրիր-փոխանցիր» մոդելի շրջանակում վարձակալվող շենքի վերաբերյալ պարզաբանում են կատարել «Ակօս» թերթին:

Հիմնադրամի նախագահ Մուրադ Քարամանը հայտնել է, թե քանի որ շինությունը պատմական կոթող է, հյուրանոց-պանդոկ կառուցվելու է երեք հողակտորի վրա՝ առանց վնաս հասցնելու ճարտարապետությանը: Այն լինելու է եռահարկ և ունենալու 35 սենյակ: Թույլտվության ժամանակը մեկ տարի է, շինարարությանը՝ 3 տարի, այսպիսով` այն կառուցվելու է 4 տարվա ընթացքում:

Քարամանը հայտնել է, որ ծրագիրը կյանքի կոչելու դեպքում հիմնադրամը տարեկան ստանալու է 180 հազար թուրքական լիրա եկամուտ և այս գումարով օգնություն է ցուցաբերելու կարիքավոր հիմնադրամներին:

Իսկ ճարտարապետ Յուսուֆ Սերթքայան տեղեկացրել է, որ սպասում են՝ նախագիծը հաստատվի Հուշարձանների պահպանության խորհրդի կողմից. «Գծագրական աշխատանքները պատրաստ են: Քանի որ պատմական կոթող է, պետք է բոլոր աշխատանքները ըստ արժանվույն կատարել: Նախագիծը չափագրման փուլում է: Թույլտվություն ստանալուն պես աշխատանքները սկսվելու են:

Հայկանուշյան դպրոցը պատմական աղբյուրներում

Թեև Յենիքափըի հայկական դպրոցի հիմնադրման վերաբերյալ հստակ տեղեկություններ չկան, սակայն ենթադրելի է, որ նախքան 19-րդ դարը հայերն այստեղ կրթական հաստատություն են ունեցել: 1880 թ. Առաքելոց դպրոցը 54, իսկ Հայկանուշյան դպրոցը 87 աշակերտ է ունեցել: Պոլսո Հայոց պատրիարքարանի կրթական խորհուրդի 1907 թ. հունվարի 1-ի ցուցակի համաձայն՝ այս երկու դպրոցն ունեցել են 12 ուսուցիչ (8 ուսուցիչ, 4 ուսուցչուհի), 87 մանկապարտեզի սան (42 աղջիկ, 45 տղա), 223 տարրական դպրոցի սան (107 աղջիկ, 116 տղա): Իսկ այս դպրոցի հետագա ճակատագրի վերաբերյալ տեղեկություն չկա:

http://www.agos.com.tr/tr/yazi/14391/tarihi-okulun-arazisinde-butik-otel
Անահիտ Քարտաշյան
Akunq.net