Անկարայում պայթեցված ականապատ մեքենան գողացված է եղել. նոր մանրամասներ երեկվա ահաբեկչությունից

Անկարայում չորեքշաբթի տեղի ունեցած խոշոր ահաբեկչությունն իրականացվել է գողացված, կեղծ պետհամարանիշներով ավտոմեքենան պայթեցնելով։
Մեքենան գողացվել է թուրքական Իզմիր քաղաքից, սակայն դրա վրա Ստամբուլի կեղծ պետհամարանիշ է եղել։

Ինչպես տեղեկացնում է Milliyet-ը, պայթյունի վայրում 2 մետր խորությամբ փոս է առաջացել։

Մեքենայում գտնվող մեկ կամ երկու մահապարտ ահաբեկիչները կտրել են զինծառայողներ տեղափոխող շարասյան ճանապարհն ու պայթեցրել մեքենան։

Ըստ պաշտոնական տվյալների՝ պայթյունի հետևանքով զոհվել է 28 մարդ, ևս 61-ը վիրավորվել են։

Նրանցից 30-ն առաջին բուժօգնություն ստանալուց հետո դուրս են գրվել հիվանդանոցներից։

Հաղորդվում է, որ վիրավորների թվում թուրքական օդուժի գեներալն ու նրա կինն են։ Նրանց վիճակը գնահատվում է բավարար։

Ավելի վաղ հաղորդվել էր, որ Թուրքիայի նախագահ Ռեջեփ Թայիփ Էրդողանն Անկարայում տեղի ունեցած պայթյունից հետո հետաձգել է Ադրբեջան կատարելիք այցը:

Հիշեցնենք, որ պայթյունը որոտացել է երևանյան ժամանակով 20:30-ին Անկարայի կենտրոնական թաղամասում` զինվորական հանրակացարանի մոտակայքում: Հաղորդվում էր, որ ոստիկանների տեղափոխող մեքենա է պայթեցվել:

http://www.tert.am/am/news/2016/02/18/ankara/1935692