ՌԴ-ն ցանկանում է որ Թուրքիան մտնի Սիրիա, սակայն Թուրքիան չպետք է այդ խայծը կուլ տա. թուրք դիվանագետ

Թուրքիան ՆԱՏՕ-ի անդամ երկիր լինելուց արդեն վերածվում է Սառը պատերազմում ճակատային երկրի, ինչը կործանարար կարող է լինել Թուրքիայի համար։ Նման հայտարարություն է արել Իրաքում եւ Մեծ Բրիտանիայում Թուրքիայի նախկին դեսպան Ունալ Չեւիքօզը։

Թուրքական Cumhuriyet-ի փոխանցմամբ՝ Ունալ Չեւիքօզը, խոսելով Սիրիայում Ռուսաստանի ներկայությանն ու Թուրքիայի գործոնի մասին, շեշտել է, թե Ռուսաստանը Սիրիայում Թուրքիայի համար ծուղակներ է պատրաստել, որոնցից մեկը Թուրքիան արդեն կուլ է տվել՝ խոցելոց ռուսական «Սու-24»-ը։  «Ներկայում Թուրքիան մտածում է, որ ցամաքային գործողություններ սկսի Սիրիայում, սակայն սա էլ կրկին Ռուսաստանի խայծն է Թուրքիայի համար։ Ռուսաստանն ուզում է, որ Թուրքիան մտնի Սիրիա։  Դրա համար Թուրքիային կստիպի ծանր վճարել։ ՌԴ-ի արտաքին քաղաքականության գծերից է, որ դիմացինին ստիպում են նմանատիպ քայլերի դիմել։ Թուրքիան ՌԴ-ի նման խաղերը տեսավ Ուկրաինայի եւ Վրաստանի դեպքում։ Սիրիայում նույն ռազմավարությունն է անում։ Թուրքիան չպետք է այդ խայծը կուլ տա»,-ասել է թուրք դիվանագետը՝ շեշտելով, թե Թուրքիան ՆԱՏՕ-ի կարեւոր անդամ լինելուց վերածվում է Սառը պատերազմի ճակատի։

Թուրք դիվանագետը պնդել է, թե Ռուսաստանն այս պահին Կովկասով, Հայաստանով, Սեւ ծովով ու Սիրիայով անկյուն է քշել Թուրքիային եւ սեղմում է օղակը։

http://news.am/arm/news/311810.html