Սիրիան Թուրքիայի հրետակոծությունների կապակցությամբ դիմել է ՄԱԿ ԱԽ-ին

Թուրքիայի կողմից Սիրիայի տարածքը  հրետակոծելը ահաբեկչական խմբավորումներին անմիջականորեն աջակցելու եւ Սիրիայի ժողովրդի ու տարածքային ամբողջականության դեմ ոտնձգության դրսեւորում է։ Այս մասին հայտարարել է Սիրիայի ԱԳՆ-ն՝ ՄԱԿ ԱԽ-ին կոչ անելով կատարել միջազգային խաղաղության պահպանման աջակցության իր պարտավորությունները, հայտնում է ՍԱՆԱ պետական սիրիական գործակալությունը։

Սիրիայի ԱԳՆ-ն 2 ուղերձ է հղել ՄԱԿ գլխավոր քարտուղարին եւ Անվտանգության խորհրդի նախագահին, որոնցում ասվում է. «2016թ. փետրվարի 13-ին Թուրքիայի ծանր հրետանին հարվածներ է հասցնել Սիրիայի քրդաբնակ տարածքներին եւ Սիրիայի Արաբական բանակի դիրքերին։ Այդ գործողությունները պատասխանն են Հալեպի նահանգում Սիրիայի բանակի առաջխաղացմանը եւ ահաբեկչական խմբավորումների  մարտական ոգին բարձրացնելու փորձ են։

Նույն օրը Բաբ Աս Սալամա անցակետից՝ թուրք-սիրիական սահմանից, երկիր է ներթափանցել «պիկապ» տեսակի 12 մեքենա՝ զինված 14.5 մմ տրամաչափի ԴՇԿ գնդացիրներով։ Մեքենայում եղել է 100 զինյալ, որոնցից կեսը՝ ենթադրաբար թուրքական ծագում ունեն»,- ասված է ուղերձում։

Ինչպես ասվում է նամակում, թուրքական կողմի  հարձակումը համընկել է Թուրքիայի վարչապետ Ահմեդ Դավութօղլուի հայտարարությանը, որում նա շեշտել էր Սիրիայի ներքին գործերին միջամտելու եւ «Ջաբհաթ ան Նուսրա», «Ջաբհաթ Աշ Շամիա», «Ահրար աշ Շամ» եւ մյուս խմբավորումներին աջակցելու իր երկրի քաղաքականության շարունակման մասին։ Դա  Թուրքիայի կողմից ՄԱԿ ԱԽ հակաահաբեկչական բանաձեւերի խախտումը պաշտոնապես ճանաչելու մասին հայտարարություն է։

Ուղերձում Սիրիայի կառավարությունը ՄԱԿ ԱԽ-ին կոչ է անում ահաբեկչության աջակցող ռեժիմներին պարտադրել կատարել հակաահաբեկչական բանաձեւերը, խզել ԻՊ-ի, «Ջաբհաթ ան Նուսրա», «Ահրար աշ Շամ» եւ «Ալ Կաիդայի» հետ կապ ունեցող մյուս խմբավորումների հետ կապը։

http://news.am/arm/news/311638.html