Ժողովուրդների դեմոկրատական կուսակցության հայ պատգամավորը հունական հոգևոր դպրոցի վերաբերյալ հարց է բարձրացրել

Ինչպես հաղորդում է «habervaktim.com» կայքը, Ժողովուրդների դեմոկրատական կուսակցության (ԺԴԿ) հայ պատգամավոր Կարո Փայլանը Թուրքիայի Ազգային մեծ ժողովի Բյուջեի և նախագծման հանձնաժողովի քննարկումների ժամանակ օրակարգ է բարձրացրել Հեյբելի կղզում գտնվող հունական հոգևոր դպրոցի փակ լինելու հարցը և պահանջել, որ ազգային փոքրամասնությունների դպրոցին կարգավիճակ տրվի:

Թող հույները ևս հավատացյալ համայնք դաստիարակեն

Փայլանը, քննադատելով Թուրքիայի և Հունաստանի միջև առկա փոխադարձության սկզբունքը, ասաց. «Դդեռևս չսովորեցի՞նք Թուրքիայի հային, ասորիին, հույնին, հրեային որպես քաղաքացի ընկալել: Նույնիսկ եթե վաղը Հունաստանը, ասենք թե Աստված մի արասցե, այնտեղի թուրքերի, մուսուլմանների նկատմամբ բռնություն կիրառի, ինչպես և անցյալում ազգայնական խունտա եկավ, մեր նկատմամբ նույն բա՞նն է կատարվելու: Դե որովհետև անցյալում այդպես եղավ: Այս տեսանկյունից պետք է շատ արագ հրաժարվել այս փոխադարձության սկզբունքից և մեր ներքին հարցերը ներսում թողելով՝ Լոզանի պայմանագրի պահպանիչ դրույթները չփոխադրենք մեր ներքին օրենսդրական դաշտ: Օրինակ՝ ասացիք, թե «հույների խնդիրները լուծվեցին»: Բա դեռևս փակ հոգևոր դպրոց կա: Բա հիմա էլ ասում եք, թե «հավատացյալ հասարակություն ենք ուզում դաստիարակել», հարգելի նախագահի խոսքն է, դե թողեք, թող հույներն էլ հավատացյալ համայնք դաստիարակեն: Ինչու՞ ոչ»:

Նախարար Չավուշօղլուն մատնանշեց Ազգային կրթության նախարարությանը

Արտգործ նախարար Մևլութ Չավուշօղլուն, կիսելով Կ. Փայլանի կարծիքը, նշեց, որ հարցը դուրս է Արտգործ նախարարության իրավասությունից, պետք է այն ուղղել Ազգային կրթության նախարարությանը:

Փայլանը կրկին բեմ բարձրացավ

Հոգևոր դպրոցի հարցը կրկին երեկ օրակարգում էր: Բյուջեի և նախագծման հանձնաժողովի քննարկումներին մասնակցում էր նաև Ազգային կրթության նախարար Նաբի Ավջըն: Կ. Փայլանը պահանջեց, որ հոգևոր դպրոցի բացման հարցում նախարարը նախաձեռնող լինի:

Հոգևոր դպրոցի հարցը կառավարության օրակարգ բարձրացրեք

Փայլանն ասաց. «Ինչու՞ հոգևոր դպրոցի հարցը Ազգային կրթության նախարարության օրակարգ տեղափոխել: Այդ դեպքում, եթե գնդակը Ձեր դաշտում է, այս հարցում Դուք էլ նախաձեռնող եղեք: Այլևս այդ հոգևոր դպրոցը թող բացվի: Պատկառանքով եմ ասում, հոգևոր դպրոցի խնդիրը չի կարող լինել Կրթության նախարարության գործը, Դուք էլ այդ գնդակը նետեք կառավարության դաշտը, թող այդ դպրոցը բացվի արդեն: Մենք նախաձեռնող լինենք, եթե Հունաստանը ամոթալի արարք ունի, թող մնա իր ամոթը: Եկեք փոխադարձության սկզբունքին հակառակ գործենք և նրանց ամաչացնենք: Այս հարցում մեր հարգելի նախարարն ու Սիրիզայի կառավարություը ևս պատրաստ են քայլեր կատարել»:

Թող փոքրամասնությունների դպրոցները կարգավիճակ ունենան

Փայլանը նշեց, որ այլևս փոքրամասնությունների դպրոցները պետք է կարգավիճակ ունենան. «Ո՛չ պետական դպրոց ենք, ո՛չ էլ մասնավոր: Շնորհակալ ենք, որ անցյալ տարի մեզ ևս աջակցեցիք, սակայն գլուխներս մի մեծ փորձանքի տակ դրեցիք. Փողը տվեցիք, ու Ֆինանսների նախարարությունը հետևներիցս ընկավ: Դժվարին կացության մեջ ենք հայտնվել: Ասում են, թե «շահույթ եք հետապնդում, հետևաբար տնտեսական կազմակերպություն եք լինելու», որովհետև կարգավիճակ չունենք: Ֆինանսների նախարարությունն էլ եկել ասում է, թե «մասնավոր դպրոցի կարգավիճակ ունեք, հետևաբար տնտեսական կազմակերպություն եք դառնալու, ֆակտուրա եք ներկայացնելու»: Մեր գոյության պատճառն այն է, որ մենք ո՛չ փոքրամասնության, ո՛չ էլ հիմնադրամների դպրոց ենք: Մենք փողով աշակերտ չենք կրթում: Մեր խնամակալները, եթե կարողանում են, նվիրատվություն են կատարում, սակայն եթե պետությունն էլ օժանդակի, պետք է այլ կարգավիճակով կատարի: Այսինքն՝ հարգելի՛ նախարար, մենք կարգավիճակ պետք է ունենանք: Այս օրենքը մոտ ապագայում սպասում ենք Ձեզանից: Միգուցե Ֆինանսների նախարարությունն էլ որևէ կարճ պայմանաժամով որևէ լուծում առաջարկի, սակայն հիմնական լուծումը կարգավիճակ տալու մեջ է»:

Akunq.net