Ինչպես հաղորդում է «Ագօս»-ը, Բիթլիսի քաղաքապետարանը քաղաքի կենտրոնում՝ Հերսան թաղամասի Քուրուբուլաք վայրում գտնվող Սուրբ Նշան եկեղեցու վերանորոգման համար նյութական օժանդակության կարիք ունի:
Արևելյան Անատոլիայի (Արևմտյան Հայաստանի – Ակունքի խմբ.) զարգացման գործակալությանը ներկայացված քաղաքապետարանի նախագիծը հաստատվել է, սակայն վերանորոգման համար դեռևս ֆինանսական օժանդակության կարիք ունի: Բիթլիսի քաղաքպետ Հյուսեին Օլանը նշել է, որ վերանորոգման համար Ստամբուլում հանդիպումներ է ունեցել: Մ. Օլանն ու իր պատվիրակությունը փետրվարի 5–ին այցելել են Թուրքիայի Հայոց պատրիարքություն և պատրիարքի փոխանորդ արքեպիսկոպոս Ա. Աթեշյանից օժանդակություն խնդրել: Օլանը տեղեկացրել է. «Եկեղեցին նախկինում եղել է հողակտորի վրա, որը պատկանել է անհատի, սակայն սեփականաշնորհման արդյունքում հողակտորն անցել է քաղաքապետարանին: Եկեղեցին անխնամ վիճակում էր: Մենք էլ ցանկացանք, որ եկեղեցու նախկին գործառույթը վերականգնվի: Եկեղեցու վերանորոգման համար ծրագիր պատրաստվեց, որը համապատասխան մարմինների կողմից հաստատվեց: Սակայն վերանորոգումը ծախսատար գործընթաց է: Նյութական աջակցության կարիք ունենք»:
Օլանը նշել է, որ արք. Աթեշյանը խոստացել է վերանորոգման ժամանակ օժանդակել տեխնիկական աշխատանքներով: Այնուհետև հավելել, որ վերանորոգումից հետո եկեղեցին օգտագործվելու է որպես քաղաքային թանգարան և ցուցասրահ, իսկ պատարագ մատուցելու պահանջ լինու դեպքում, որոշակի ժամանակահատվածում եկեղեցին հնարավոր կլինի տրամադրել պատարագի համար:
Akunq.net
Leave a Reply