Նախկին հայկական եկեղեցին վերածվում է մշակութային կենտրոնի

Թուրքիայի Հանրապետությունում հայկական մշակութային ժառանգությամբ հետաքրքրվողները քիչ թե շատ գիտեն, թե քրիստոնեական մշակութային կոթողներն ինչ ճակատագրի են արժանանում: Համաձայն դարեր շարունակ գործող սխեմայի՝ եկեղեցիները կամ վերածվել են մզկիթի, կամ հիմնահատակ ավերվել, կամ էլ, լավագույն դեպքում, մշակութային կենտրոն դարձել: Վերջին տասնամյակում կարծես թե այս սխեմայից մի փոքր շեղում է նկատվում. եկեղեցիները զբոսաշրջության նպատակով վերանորոգվում են՝ ստանալով թանգարանի կամ մշակութային կենտրոնի կարգավիճակ՝ կարծես ասելու՝ այո՛, այս հողերում երբեմն քրիստոնյաներ են եղել: Թուրքական ղեկավար շրջանակները կուրծք են ծեծում՝ գոռալով՝ «Դե տեսեք, թե մենք որքան հանդուրժող ենք»: Այո՛, հանդուրժող եք մատների վրա հաշված թվով շինությունների նկատմամբ, հապա որտե՞ղ էր ձեր հանդուժողականությունը, երբ արմատախիլ էիք անում այդ շինությունների տերերին՝ այդ հողերի վրա ապրող ժողովուրդներին: Որտե՞ղ է ձեր հանդուրժողականությունը, երբ Դիրաբեքիրում կրակ են բացում հաց գնելու դուրս եկած երեխայի կամ հղի կնոջ վրա՝ գոռալով «Դուք բոլորդ սատկելու եք հայերի նման»…

Ինչպես հաղորդում է «www.istanbulhaber.com.tr» կայքը այս անգամ էլ վերանորոգվել է Թուրգութլույում հայկական եկեղեցին, որ նախկինում օգտագործվել է որպես քաղաքապետարանի շենք: Վերանորոգման աշխատանքներից հետո շինությունը ծառայելու է որպես Կրթական, մշակութային և արվեստի կենտրոն:

Բնականաբար, ոչ մի լրատվական կայք չի ներկայացնում եկեղեցու պատմությունը, հարց չի բարձրացնում, թե այդ ինչպես է եղել, որ եկեղեցին դարձել է քաղաքապետարանի շենք: Որտեղ են երբեմնի մեր հնազանդ ժողովուրդ կոչված հայ հարևանները:
Հանդուրժող եք, այո՛

Akunq.net