Կազմվել է Թուրքիայի քրիստոնեական ժառանգության քարտեզը

Հրանտ Դինք հիմնադրամը «Անատոլիական մշակութային ժառանգություն» նախագծի շրջանակներում հայերի, հույների ասորիների և հրեաների կողմից կառուցված եկեղեցիների, սինագոգների, վանքերի, դպրոցների, հիվանդանոցների ու գերեզմանատների գույքագրում է անցկացրել: Մոտ 2.5 տարի տևած աշխատանքների արդյունքում ցուցակագրվել է 10 հազարի չափ կառույց, որոնցից 4.600 հայկական է, 4100-ը` հունական, 650-ը` ասորական, 300-ը` հրեական: Հիմնադրամը այս բոլոր կառույցները ներառող ինտերակտիվ քարտեզ է կազմել, որը Ermenihaber.am-ի փոխանցմամբ՝ կարելի է տեսնել Turkiyekulturvarliklari.comկայքում:

Աշխատանքներն իրականացրել են հետազոտողներ Վահագն Քեշիշյանը, Նորա և Զաքարիա Միլդանօղլուները, Նորայր Օլգարը, Մուստաֆա Բաթմանը, Էզգի Դենիզ Բերքը, Մերվե Քուրթը, Թունա Բաշըբեքը և այլք:

Հետազոտողները, կանգուն մնացած կառույցներից բացի, ողջ Անատոլիայի համար կազմել են նաև քանդված, ավերված, չպահպանվող, որպես պահեստ ու ախոռ օգտագործվող կամ մզկիթի վերածված կառույցների ցուցակ: Նախագծին աջակցություն են ցուցաբերել Թուրքիայի Եվրամիության հարցերով նախարարությունը, «Բաց հասարակություն» և «Chrest» հիմնադրամները:

Թուրքիայում հրատարակվող հայկական «Ակօս» թերթին աշխատանքի վերաբերյալ մանրամասներ են պատմել նախագծի մասնակիցները:

Վերջիններս նշել են, որ սա իր բնույթով եզակի աշխատանք է, քանի որ մինչև օրս Թուրքիայի քրիստոնեկան կառույցների վերաբերյալ նմանատիպ համապարփակ ուսումնասիրություն չէր կատարվել:

Հեղինակները նշել են, որ լայնորեն օգտվել են եկեղեցական մատյաններից և բոլոր այն աղբյուրներից, որոնք այս կամ այն կերպ առնչվել են խնդրո առարկա կառույցների հետ: Ուսումնասիրություններ կատարելու հնարավորություն են ունեցել նաև Թուրքիայի կառավարության ենթակայության տակ գտնվող օսմանյան արխիվներում:

Հեղինակները նշել են, որ աշխատանքների ժամանակ ամենամեծ դժվարությունը ստեղծել են Թուրքիայի բնակավայրերի անունները, որոնց հանրապետական շրջանում համատարած նոր անուններ են տրվել:
Նախաձեռնության մասնակիցները տեղեկացրել են, որ աշխատանքներն այքանով չեն ավարտվելու, քանի որ 2-րդ փուլով նախատեսում են մեկնել Թուրքիայի տարբեր շրջաններ և մեկ-մեկ ստուգել բոլոր այն կառույցները կառույցները, որոնց մասին տեղեկություններ են հավաքագրել:

Hayernaysor.am