Թուրքական «Գորշ գայլերին» կասկածում են Սինայում A321-ի ահաբեկչության կազմակերպման մեջ

Եգիպտոսում «Կոգալիմավիա» ընկերության Airbus A321 օդանավում ահաբեկչություն կազմակերպելու հետ կարող են կապ ունենալ «Գորշ գայլեր» թուրքական ազգայնական խմբավորման գրոհայինները։ Այս մասին հայտնում է «Կոմերսանտ»-ը՝ վկայակոչելով ռուսական հատուկ ծառայություններում իր աղբյուրները։

Թերթը նշում է, որ «Իսլամական պետության» հետ առնչություն ունեցող «Գորշ գայլերը» Եգիպտոսում գործում են 1960-ական թթ. վերջից։ Կասկածներ կան, որ հենց «Գորշ գայլերը», մասնավորապես Ալփարսլան Չելիքն է սպանել ռուսական Սու-24 կործանիչի օդաչուին այն բանից հետո, երբ օդանավը խոցվել էր թուրքական օդուժի կողմից։

Նշենք, որ հունվարի 29-ին Reuters-ը, վկայակոչելով իր աղբյուրները, հայտնել էր` ԻՊ-ը Սինայի թերակղզում ռուսական օդանավը պայթեցրել էր EgyptAir-ի մեխանիկի օգնությամբ, որը ջիհադականներից մեկի եղբայրն է։

Գործակալության տեղեկություններով՝ 4 կասկածյալները՝ մեխանիկը, նրան օգնած բեռնակիրը եւ 2 ոստիկաններ, ձերբակալված են։ Հունվարի 28-ին Շարմ էլ Շեյխի օդանավակայանը հերքել էր այն տեղեկությունները, որ ռումբը օդանավ է բարձրացրել իրենց աշխատակիցը։

http://news.am/arm/news/309115.html