Պեռլինի շարժանկարի միջազգային փառատօնին պիտի ներկայացուի սուրիահայ բեմադրիչին վաւերագրական ժապաւէնը

Պեռլինի շարժանկարի միջազգային փառատօնին պիտի ներկայացուի սուրիահայ բեմադրիչ Աւօ Գաբրիէլեանի «Տուներ Առանց Դռներու» վաւերագրական ժապաւէնը։ Այս մասին կը տեղեկացնէ Սուրիոյ «Գանձասար» շաբաթաթերթը:

Ժապաւէնը կը ներկայացնէ Հալէպի Նոր Գիւղ շրջանի բախումնային գիծին վրայ բնակող հայ ընտանիքի մը կեանքը, որ 2015-ին կ՚ապաստանի Պէյրութ։ Նոր Գիւղը, որ Հայոց Ցեղասպանութենէն ճողոպրած հայերուն օթեւանը դարձած էր 100 տարի առաջ, Սուրիոյ տագնապի օրերուն կը դիմաւորէ տեղացի տարագրեալներ։

Հեղինակը իր փոքրիկ տեսախցիկով կը նկարահանէ իր բնակավայրի թաղին կրած փոփոխութիւնները, աւերները, բնակչութեան դիմագրաւած դժուարութիւններն ու սրտաճմլիկ պատկերները եւ իւրայատուկ ոճով զուգահեռներ կը գծէ Հայոց Ցեղասպանութեան ու Սուրիոյ Ժողովուրդին կրած տառապանքներուն միջեւ։

http://www.yerakouyn.com/?p=98696