ԵՄ-ն Թուրքիային դարձյալ կոչ է արել քրդերի հետ հրադադար հաստատել. Մոգերինի

Եվրամիությունը դարձյալ թուրքական իշխանություններին կոչ է արել անհապաղ հրադադարի գնալ քրդերի հետ և վերսկսել բանակցությունները։ Այդ մասին հայտարարել է ԵՄ դիվանագիտության ղեկավար Ֆեդերիկա Մոգերինին Թուրքիա այցի ժամանակ, հայտնում է «ՌԻԱ Նովոստի» գործակալությունը։

«Մենք մեր մտահոգությունն ենք հայտնել Թուրքիայի հարավ-արևելքում ներքին իրավիճակի հետ կապված։ Մենք դա ավելի մանրամասն կքննարկենք հետագա բանակցությունների ընթացքում։ ԵՄ-ն վճռականապես դատապարտում է ահաբեկչությունների բոլոր ձևերը, այդ թվում՝ Քուրդիստանի աշխատավորական կուսակցության (PKK) կողմից։ Մենք կոչ ենք անում անհապաղ դադարեցնել կրակն ու վերադառնալ քրդերի հետ խաղաղ բանակցություններին, որոնք իրականանում էին վերջին տարիներին»,-ասել է Մոգերինին Անկարայում տեղի ունեցած մամուլի ասուլիսի ընթացքում։

Թուրքական իշխանությունները դեկտեմբերին պարետային ժամ էին հայտարարել քրդաբնակ շատ շրջաններում՝ մասնավորապես Սուր, Ջիզրե, Սիլոփ, Նուսեյբին, Դարգեչիթ բնակավայրերում։ Ջիզրեում և Սուրում շարունակվում են բախումները քուրդ զինյալների և թուրք ուժայինների միջև։

http://www.tert.am/am/news/2016/01/25/mogerini/1910520