«Հովակիմ 1461» հիմնադրամից ստացված եկամուտով մկրտության և հոգեհանգստի խոստում

Պոլսո Հայոց պատրիարքի փոխանորդ Արամ Աթեշյանը հայտարարեց, որ «Հովակիմ 1461» հիմնադրամից ստացված եկամուտով նախատեսում են մկրտություն և հոգեհանգիստ կատարել:

Պոլսո Հայոց պատրիարքի փոխանորդ Արամ Աթեշյանը Կենտրոնական վարժարանի համար կազմակերպված մատաղի ժամանակ իր ելույթում պատրիարքարանի իրավաբանական անձ ճանաչելու խնդրին ժամանակավոր լուծում տալու համար ստեղծված «Հովակիմ 1461» հիմնադրամի հետ կապված խոստումներով հանդես եկավ: Աթեշյանը պարզաբանեց, որ հիմնադրամից ստացված եկամուտով պլանավորում են մկրտություն և հոգեհանգիստ կատարել. «Մեկ քահանայով կատարվող մկրտության և հոգեհանգստի համար որևէ գումար չի գանձվելու: Գումար գանձվելու է միայն այն ժամանակ, երբ մեկ քահանայից ավել պահանջեն: Բացառություն է կազմում պսակադրությունը, քանզի այն կամովի է, իսկ մկրտությունն ու հոգեհանգիստն անհրաժեշտություն: Եթե որպես պատրիարքարան ցանկանում ենք, որ մեր համայնքի անդամները քրիստոնյա լինեն, ապա որպես հաստատություն պետք է անձնազոհություն կատարենք, գումար չենք գանձելու»:

Սակայն այս խոստումը կախված է «Հովակիմ 1461» հիմնադրամի եկամուտներից: Աթեշյանը հավելեց. «Կարծում եմ 1-2 տարվա ընթացքում կսկսենք եկամուտ ստանալ: Եթե այդպես լինի, պատրիարքարանն էլ «օգնություն ցույց տվող» հաստատություն կդառնա»: Հիմնադրամի ստեղծման վերաբերյալ քննադատությունները շարունակվում են: Փաստաբան Սեպուհ Ասլանգիլը «Ագօս»-ում անդրադարձել է խնդրահարույց կետերին:

2015 թ. մայիսին «Ռեսմի» թերթում լույս տեսած պաշտոնական որոշմամբ իր գործունեությունը սկսած «Հովակիմ 1461» հիմնադրամի վերաբերյալ Աթեշյանը նշեց. «Պատրիարքարանի վիճակը ոչնչով չի տարբերվում բյուջեի ճեղքվածքի համար պայքարող ղեկավար խորհուրդների վիճակից: Մեր ողջ եկամուտը գոյանում է պսակադրությունից, հոգեհանգստից և մկրտությունից ստացված գումարներից: Եվ գիտե՞ք, թե որքան է կազմում այս եկամուտը: Ամսական 7-8 հազար թուրքական լիրա: Կատարված ծիսակարգերի ամենափոքր նվազումն անգամ դժվարության մեջ է դնում մեզ: Այդ իսկ պատճառով որոշեցինք հիմնադրամ ստեղծել և ստեղծեցինք «Հովակիմ 1461 հիմնադրամը»: Անցյալ շաբաթ հիմնադրամի ստեղծման վերաբերյալ բոլոր գործընթացներն ավարտին հասցրեցինք: Հիմնադրման համար որպես երաշխիք պետք էր անշարժ գույք կամ էլ գումար ներկայացվեր: Դրա համար իմ անձնական անշարժ գույքը որպես երաշխիք ներկայացրեցի: Այս հիմնադրամը պատրաիքարանի տարատեսակ ծախսերը հոգալու նպատակով է հիմնադրվել: Դատարանը ևս հաստատել է հիմնադրամը: Մեր ղեկավար խորհուրդը, որը բաղկացած է հոգևորականներից և աշխարհականներից, նպատակ ունի ստացված եկամուտների 25 տոկոսը հատկացնել մեր դպրոցներին և մեր այն հաստատություններին, որոնք դրա կարիքն ունեն: Բացի այդ` ցանկությունս է համալսարանական ուսանողներին ևս կրթաթոշակ տալ»:

Առանց գումարի մկրտություն և հոգեհանգիստ

Աթեշյանը պարզաբանեց, որ հիմնադրամից ստացված եկամուտով ծրագրում են մկրտություն և հոգեհանգիստ կատարել. «Մեկ քահանայով կատարվող մկրտության և հոգեհանգստի համար որևէ գումար չի գանձվելու: Գումար գանձվելու է միայն այն ժամանակ, երբ մեկ քահանայից ավել պահանջեն: Բացառություն է կազմում պսակադրությունը, քանզի այն կամովի է, իսկ մկրտությունն ու հոգեհանգիստն անհրաժեշտություն: Եթե որպես պատրիարքարան ցանկանում ենք, որ մեր համայնքի անդամները քրիստոնյա լինեն, ապա որպես հաստատություն պետք է անձնազոհություն կատարենք, գումար չենք գանձելու: Եկեք մկրտեք ձեր երեխաներին: Արդեն իսկ մեր աղքատ մարդկանց հոգեհանգստի ծախսը՝ դագաղից մինչև դին տեղափոխող մեքենա, հոգում են մեր ղեկավար խորհուրդները: Մահն անխուսափելի է, մենք էլ ենք այս աշխարհից հեռանալու: Այնպես ենք անելու, որ մի քահանայով կատարվող հոգեհանգստի համար գումար չգանձենք: Կարծում եմ 1-2 տարվա ընթացքում կսկսենք եկամուտ ստանալ:

Արտերկրում բնակվող ծանոթներիցս մեկն ասել է, որ անվերջանալի դատավարության ավարտին ստացած հողակտորի 35 հազար քառ. մ կտորը մեր հիմնադրամին է տալու: Ես էլ ասացի, որ «ձեռքներիցդ ինչ որ գալիս է, կատարեք, դատը շահեք, մենք էլ սկսենք եկամուտ ստանալ»: Արտերկրում բնակվող բազմաթիվ բարեկամներ ունենք, որոնք հողակտորներ ունեն, նրանցից լավ լուրեր ենք ստանում: Մեր այս բարեկամի պես համայնքին օգտակար լինել ցանկացող բազմաթիվ աջակիցներ ունենք: Մեր ծրագրերն այսպիսին են: Երբ եկամուտ ստանա, պատրիարքարանն էլ է այլևս «աջակցող» հաստատություն լինելու»:

Պարույր Քույումջյան

http://www.agos.com.tr/tr/yazi/14078/hovakim-1461den-vaftiz-cenaze-vaadi