Թուրքիայում հերթական հայկական եկեղեցին է գանձագողերի պատճառով քանդվում

Երզնկայում 1800-ականներին կառուցված Սուրբ Աստվածածին եկեղեցին գանձ որոնողների գործողությունների հետեւանքով վերածվել է ավերակների։

Ինչպես տեղեկացնում է Ստամբուլի հայկական «Ակօս»-ը, երկար տարիներ բախտի քմահաճույքին մնացած եկեղեցին վերջին օրերին գանձ որոնողների այցելության վայր է դարձել։ Մեծ վնասների ենթարկված շինության պահպանությանն ուղղված անվտանգության ոչ մի քայլ չի իրականացվել։ Միայն ժանդարմերիայի կողմից եկեղեցու դռանը փական է տեղադրվել։ Գանձ որոնողների գործողությունների հետ կապված հետաքննություն չի սկսել։ Երզնկայի Դեյիրմենքյոյի բնակիչներից Թոլգա Գյուրյունը կապ է հաստատել «Ակօս»-ի հետ եւ պատմել եկեղեցու վիճակի մասին։

Եկեղեցին օրակարգում հայտնվել էր հինգ տարի առաջ, երբ եկեղեցու սրբապատկերները գողացվել էին։ Թոլգա Գյուրյունը, ով զբաղվում է եկեղեցու պահպանության հարցով, հայտնել է, որ եթե անվտանգության միջոցառումներ չիրականացվեն, ապա նույնը կրկնվելու է։ Նա նշել է, թե վերջին շրջանում գանձ որոնողների հետաքրքրության կենտրոնում հայտնված եկեղեցու դռանը ժանդարմերիան փական է դրել, սակայն սա գանձ որոնողներին չի վախեցի և արգելք չի հանդիսանա։

Նշվում է, որ քաղաքի կենտրոնից 15 կիլոմետր հեռավորության վրա գտնվող Սուրբ Աստվածածին եկեղեցին վերանորոգվելու էր Երզնկայի նահանգապետարանի կողմից։ Սակայն նահանգապետի փոփոխությունից հետո դրան ուղղված ոչ մի քայլ չի իրականացվում։ Հետազոտության ընթացքում պարզվել էր, որ եկեղեցու երկրորդ հարկում փլուզում կա, սակայն վերանորոգման աշխատանքներից հետո եկեղեցու ընդհանուր շինությունը կարող էր նախկին տեսքն ունենալ։

http://news.am/arm/news/307293.html