Դինքի մահվան տարելիցի օրը ցեղապաշտական գրություն` Կ.Պոլսի հայկական դպրոցի պատին

Հունվարի 19-ին, լրանում է պոլսահայ լրագրող և հրապարակախոս, «Ակօս» հայկական շաբաթաթերթի գլխավոր խմբագիր Հրանտ Դինքի սպանության 9-րդ տարին: Այսօր` Դինքի մահվան տարելիցի օրը, Կ.Պոլսի Սկյուտար թաղամասում գտնվող Գալֆայան հայկական դպրոցի պատին հայտնվել է ցեղապաշտական գրություն: Այդ մասին, ըստ Akunq.net-ի, հաղորդում են թուրքական լրատվամիջոցները:

Աղբյուրի համաձայն` պատին մասնավորապես գրված է եղել «տանջանք` հային» արտահայտությունը: Նշենք, որ նախկինում ևս պատահել է, որ Դինքի մահվան տարելիցի օրը Թուրքիայում նկատվեն ցեղապաշտական դրսևորումներ, օրինակ` փողոցում հայտնվեն Դինքի մարդասպանի պես` սպիտակ գլխարկներ կրող ոստիկաններ և այլն:

Աղբյուրը նաև հիշեցնում է, որ Գալֆայան նախակրթարանն ու միջնակարգ դպրոցը հիմնադրվել են 1866 թ.` Սրբուհի Նշան-Գալֆայանի կողմից: Դպրոցն Ստամբուլի Սկյուտար շրջան է տեղափոխվել 1971 թվականին:

Akunq.net