Խաղաղության կոչ արած թուրք գիտնականների դեմ տխրահռչակ 301-րդ հոդվածով հետաքննություն է սկսվել

Ստամբուլի գլխավոր դատախազությունը, Էրդողանի ցուցումով, «Խաղաղության համար գիտնականների նախաձեռնության» անդամների նկատմամբ 301-րդ հոդվածի հատկանիշներով հետաքննություն է սկսել։

Ինչպես տեղեկացնում է Ստամբուլի հայկական «Ակօս»-ը Թուրքիայի նախագահին ուղղված խաղաղության կոչի տեքստի տակ ստորագրած 1128 թուրք եւ օտարերկրացի գիտնականների նկատմամբ 301-րդ հոդվածի (թյուրքականության վիրավորում) հատկանիշներով սկսված հետաքննության շրջանակներում նախատեսվում է 6 ամսից մինչեւ 2 տարվա ազատազրկում։ Գիտնականներին նաեւ մեղադրանք է ներկայացվել «ահաբեկչական կառույցի» քարոզչություն հոդվածով, որն էլ իր հերթին նախատեսում է 1-ից 5 տարվա ազատազրկում։

Նշենք, որ հենց տխրահռչակ 301-րդ հոդվածով էլ նախկինում դատապարտել էին Հրանտ Դինքին, ում ավելի ուշ արդարացրեց ՄԻԵԴ-ը։

Հիշեցնենք, որ Թուրքիայից ու արտասահմանից հայտնի 1128 գիտնական ու մտավորական ստորագրել են մի տեքստի տակ, որով կոչ են անում քրդերի հետ խաղաղություն հաստատել, դադարեցնել արեւելքում քրդերի կոտորածն ու թույլ տալ` հանձնաժողովներ մտնեն բախումների գոտիներ։ Էրդողանն այդ գիտնականներին դավաճան էր անվանել ու հրահանգել հետաքննություն սկսել նրանց դեմ։ Արդեն ձերբակալվել է 12 գիտնական Քոջաելիի համալսարանից։

http://news.am/arm/news/306660.html